Rueda recoñece que "moitas" das queixas en sanidade derivan da falta de profesionais
O vicepresidente da Xunta asegura que este problema non afecta exclusivamente a Galicia, senón ao conxunto de España, e mostrouse convencido de que outras autonomías tamén rexistran este tipo de queixas.
Por Europa Press / Redacción | SANTIAGO DE COMPOSTELA | 02/10/2019 | Actualizada ás 13:16
O vicepresidente da Xunta, Alfonso Rueda, enmarcou dentro do "habitual" que a área sanitaria acapare boa parte das queixas que os cidadáns galegos formulan ante a institución do Valedor do Pobo, dado o elevado número de usuarios e a "sensibilidade" da área.
"Esta vez non foi unha excepción", esgrimiu, en relación ao informe do Valedor correspondente ao pasado exercicio e que foi entregado ao xefe do Lexislativo, Miguel Santalices, este martes. Agora, tramitarase na Cámara autonómica.
En canto ás queixas recibidas na Xunta, Rueda asegurou que se analizan e se responde favorablemente sempre que poidan ser atendidas.
Se isto non ocorre, esgrimiu que é preciso explicar que hai "moitas situacións" dentro das queixas de sanidade que derivan "da falta de profesionais", que a Xunta "fai o posible por cubrir".
En todo caso, concluíu que o problema da falta de profesionais non afecta exclusivamente a Galicia, senón ao conxunto de España, e mostrouse convencido de que outras autonomías tamén rexistran este tipo de queixas.
