Un bebé de 6 meses permanece ingresado na Coruña por queimaduras por auga quente nunha escola infantil

Un bebé de seis meses leva desde o pasado xoves 26 de setembro ingresado no Hospital Teresa Herrera da Coruña debido a unhas queimaduras producidas pola caída da auga quente para prepara biberóns na escola infantil municipal Os Cativos.

Segundo relatan fontes do Concello herculino, trátase dun "accidente" ocorrido hai máis dunha semana, cando a profesora quentou auga nun microondas e, ao coller a outro neno en brazos, tirouna sobre o bebé.

Por estes feitos, tanto a administración local como a escola preparan un informe para esclarecer o ocorrido. Con todo, tanto os servizos sociais como os técnicos apuntan que se trata dun "accidente", aseguran fontes do Concello.

E é que, segundo as fontes consultadas, o centro "pasou todas as inspeccións da Xunta" e ten todo "en orde". "En 30 anos que leva funcionando nunca pasou nada", insisten.

A pesar de que os pais do bebé xa mostraron a súa intención de emprender accións legais, o Consistorio di non ter constancia de ningunha denuncia polo momento.

Por agora, fontes do Pazo de María Pita xa se puxeron en contacto co hospital e, aínda que nun primeiro momento o pequeno ingresara na unidade de vixilancia, actualmente xa se atopa en planta.