Más País segue alimentándose de exmembros de Podemos en Galicia

Más País publicou este domingo as listas de candidatos para as próximas eleccións xerais do 10 de novembro e abriu na súa páxina web a votación para que os seus inscritos as ratifiquen. Nelas, figura como número un por Pontevedra o exresponsable de medio ambiente de Podemos Galicia Daniel Liceras Pascual, mentres que, como xa de anunciara, a exfundadora do partido morado Carolina Bescansa encabeza a candidatura da Coruña.

O líder de Más Madrid, Íñigo Errejón, e a portavoz de Más Madrid no Concello de Madrid, Rita Maestre, na reunión das bases do partido nunha asemblea xeral en Madrid o 25 de setembro de 2019 | Fonte: Europa Press

En concreto, segundo informou o partido que lidera Íñigo Errejón, os máis de 20.600 inscritos de Más País teñen ata as 22.00 horas deste domingo para votar a ratificación das listas.

A iniciativa de Errejón conta deste xeito con varios integrantes da cúpula de Podemos en Galicia. Ademais de Liceras e Bescansa, aparecen nas listas exintegrantes do Consello Cidadán como Natalia Prieto Fernández e Rogelio Santos Queiruga —irmán de Carmen Santos, ex secretaria xeral de Podemos en Galicia—, que dimitiron esta mesma semana.

Así, a lista por Pontevedra ao Congreso, a falta de ratificación por parte dos inscritos, encabezaraa o xestor ambiental Daniel Liceras Pascual, seguido por Eduardo Alfonso Ortiz Prezado, Ruth Vallejo Vidal, Laura Villaverde Rodríguez e Sergio Míguez Bello. Nesta circunscrición non figura candidatura para o Senado.

Por parte da Coruña, tras Carolina Bescansa están Natalia Prieto, Bieito Cambeiro Porrua, Eduardo Martínez Nieto, José Manuel Romarís Cercós e Rogelio Santos Queiruga como candidatos á Cámara Baixa. Ao senado, Olga Dourado González, próxima a Bescansa, aparece como candidata única, con Manuel Iglesiaas e Fabiana Beatriz García Porto de suplentes.

"PROCESO PARTICIPATIVO"

Más País puxo en marcha un "proceso participativo" para a "ratificación" das listas que presentará ás Cortes Xerais nos comicios do 10 de novembro.

Segundo explicou a plataforma, o proceso comezou o pasado venres coa inscrición dos votantes e os candidatos, tras o cal hoxe publicáronse as candidaturas e levará a cabo a votación entre as 8,00 e as 22,00 horas. Ás listas puidéronse presentar todas aquelas persoas que estean inscritas na web de Más País e que asinasen o código ético e a carta financeira.

Para cumprir cos prazos legais, Más País ten ata este luns, 7 de outubro, para comunicar as súas listas electorais ás xuntas electorais provinciais.

Concretamente, todos os partidos e coalicións teñen de prazo ata as doce da noite de mañá para presentar nas xuntas electorais provinciais as súas candidaturas ao Congreso e ao Senado para as eleccións xerais do próximo 10 de novembro.

Estas listas publicaranse no Boletín Oficial do Estado (BOE) o vindeiro mércores, 9 de outubro, aínda que non serán definitivas porque a partir de aí abrirase un breve prazo para revisalas, corrixir erros e estudar os posibles recursos e impugnacións que se poidan presentar.