Interceptada unha muller cando circulaba cun patinete eléctrico pola autoestrada AP-9

Unha patrulla da Garda Civil interceptou na mañá deste domingo a unha muller que circulaba pola AP-9, á altura da cidade de Pontevedra, cun patinete eléctrico.

Segundo informa a Benemérita, trátase dunha veciña da Boa Vila de 36 anos de idade que accedera á autoestrada pola incorporación de Lourido.

Tras iso, segundo o relato da Garda Civil, atravesou a mediana da calzada, pero dous motoristas do destacamento de Tráfico lograron interceptala despois de que cruzase a ponte da ría en sentido Pontevedra.