Vox mantén a tía vasca de Santiago Abascal como número un por Ourense
Nas listas ao Senado só repite o que fora candidato por Lugo, Antonio Miguel Gálvez.
Por Europa Press / Redacción | Santiago de Compostela | 07/10/2019 | Actualizada ás 20:29
Cristian González Nogueira será o cabeza de lista de Vox ao Congreso por Lugo nas eleccións xerais do próximo 10 de novembro, o único 'número un' á Cámara baixa que a formación ultradereitista cambia con respecto ás listas do 28 de abril.
Deste xeito, nas candidaturas volverá figurar a tía materna de Santiago Abascal, Begoña Conde, como cabeza de lista ao Congreso por Ourense. Conde é natural do País Vasco, onde viviu toda a súa vida.
Pola súa banda, o avogado Miguel Ángel Fernández e o xeneral de división do corpo de intendencia do Exercito de Terra agora na reserva Antonio Budiño serán os candidatos pola Coruña e Pontevedra.
Con todo, a diferenza das listas para o Congreso, Vox si cambiou a maioría dos seus cabezas de lista ao Senado polas provincias galegas, de forma que só mantén o 'número un' por Lugo, Antonio Miguel Gálvez.
En concreto, pola Coruña encabezará a candidatura Juan Garcilaso de la Vega Muñoz; mentres que por Pontevedra farao Antonio Ramilo Rodríguez. Por último, Julio Rodríguez Garrido ocupará o primeiro posto á Cámara alta por Ourense.
