O Sergas ofrece 9 prazas para persoas con discapacidade intelectual

O Servizo Galego de Saúde (Sergas) convoca un novo concurso-oposición, con nove prazas, para o ingreso na categoría de persoal de servizos xerais, en postos reservados para ser cubertos por persoas que acrediten discapacidade intelectual.

Así o informou a Consellería de Sanidade mediante a publicación este martes no Diario Oficial de Galicia (DOG) dunha resolución da Dirección Xeral de Recursos Humanos.

Sanidade explicou que se trata do terceiro proceso selectivo convocado polo Sergas no que se habilita unha "quenda diferenciada de acceso" para as persoas con discapacidade intelectual, coas "pertinentes adaptacións de temarios e tempos de realización das probas que permiten a concorrencia destes aspirantes en condicións de igualdade ao emprego público, facilitando así a súa integración laboral", abundou.

Deste xeito, a Consellería engade que está previsto "avanzar na integración profesional deste colectivo" coa convocatoria de novas prazas selectivas para o acceso a outras categorías.

Sanidade indica que o formulario de inscrición estará dispoñible a partir deste mércores, 9 de outubro, no sistema informático FIDES/Expedient-e/Procesos/OPE. O prazo remata o próximo 8 de novembro.