Máis de trinta centros galegos imparten o Bacharelato de Excelencia en Ciencias e Tecnoloxía este curso
O obxectivo deste bacharelato é promover a vocación do alumnado cara á investigación científica e tecnolóxica, mediante unha metodoloxía que lle facilite a incorporación e a adaptación ao ensino universitario.
Por E.P. | SANTIAGO DE COMPOSTELA | 09/10/2019 | Actualizada ás 19:12
A conselleira de Educación, Carmen Pomar, visitou este mércores o IES compostelán de Lamas de Abade, un dos centros que este ano empezarán a impartir o Bacharelato de Excelencia en Ciencias e Tecnoloxía (STEMBach).
Segundo informou a Xunta, en Galicia serán un total de 31 centros educativos os que impartirán esta formación, dos que 16 farano por primeira vez. O pasado curso, un total de 200 alumnos de 15 centros educativos cursaron estes ensinos.
Pomar destacou a oportunidade que esta iniciativa supón para o alumnado, dado que lles permite achegarse a un modelo educativo máis apegado á Universidade. Así mesmo, mostrouse satisfeita polo feito de que o ano pasado a porcentaxe de mulleres que cursaron estes estudos foi do 50%.
O obxectivo deste bacharelato é promover a vocación do alumnado cara á investigación científica e tecnolóxica, mediante unha metodoloxía que lle facilite a incorporación e a adaptación ao ensino universitario, tendo en conta, ademais, a perspectiva de xénero.
Ademais, favorécese "unha mentalidade científica, rigorosa, ordenada e crítica, así como o desenvolvemento da creatividade, do sentido da iniciativa ou do emprendimiento e da solución de problemas", explica a Xunta.
O alumnado que curse este bacharelato, no segundo ano deberá desenvolver un proxecto de investigación individual ou colectivo, con posterior defensa pública. Así mesmo, cursará unha materia extracurricular semanal, de dúas ou tres horas, relacionada co ámbito das materias STEM e cunha orientación ao traballo na mellora das competencias comunicativas e dixitais.
O bacharelato complétase con actividades de formación organizadas polo centro en colaboración con universidades, entidades ou organismos investigadores, como conferencias, talleres ou proxectos.
