(Vídeos) Galegos atrapados no aeroporto de Barcelona entre cargas policiais
“Nestes momentos están lanzando gases lacrimóxenos e hai cargas”, asegura unha galega que levaba máis dunha hora e media tentando coller un voo. Dous voos con destino A Coruña e Santiago foron cancelados polas protestas.
Por Galicia Confidencial | Barcelona | 14/10/2019 | Actualizada ás 17:58
Os centos de manifestantes independentistas que acudiron ao aeroporto do Prat, en Barcelona, conseguiron colapsar o tráfico aeroportuario, sobre todo, o da terminal 1, que é a dos voos internacionais. Unha situación dunha “gran tensión” tal e como relatan galegos que se atopan na terminal a Galicia Confidencial.
“Nestes momentos están lanzando gases lacrimóxenos e hai cargas policiais”, apunta unha lectora do GC que asegura que a tensión é “máxima”. Ela leva no aeroporto máis de hora e media tentando coller un avión.
Para acceder ao aeroporto tivo que correr campo a través debido ao colapso circulatorio. "Estamos pasando moito medo", asegura pola gran tensión entre policía e manifestantes.
VOOS CANCELADOS
Dous voos que saían do aeroporto de Barcelona con destino A Coruña e Santiago foron cancelados polas protestas convocadas por Tsunami Democràtic como resposta á sentenza do proceso soberanista.
Un dos voos cancelados tiña previsto despegar ás 20,05 horas cara á Coruña, onde tiña previsto chegar ás 21,50 horas.
Pola súa banda, o outro voo afectado, operado por Veling, tiña previsto saír ás 21,25 horas do Prat cara ao aeroporto de Lavacolla.
En total, 67 voos que saían do Aeroporto de Barcelona - El Prat foron cancelados polas protestas convocadas.
