Incautadas máis de 12.000 nasas irregulares en tres meses na costa galega
O 95% destas gaiolas para animais mariños eran de polbo.
Por E.P. | SANTIAGO DE COMPOSTELA | 20/10/2019 | Actualizada ás 15:49
Os servizos de Gardacostas de Galicia incautaron máis de 12.000 nasas --dispositivos de pesca-- caladas nas costas galegas de forma irregular desde xullo a setembro deste ano.
A Consellería do Mar explicou nun comunicado que o 95% destas gaiolas para animais mariños eran de polbo, un produto que "resulta atractivo para os furtivos pola súa gran calidade e o prezo que alcanza no mercado".
A captura furtiva deixou este balance despois de que se puxese fin á veda de polbo por parte da administración autonómica. En concreto, os efectivos de Gardacostas realizaron máis de 2.800 inspeccións, determinaron 850 infraccións e comisaron máis de 10.000 quilos de distintas especies.
Por zonas, o maior número de nasas (2.900) atopáronse no sur da Ría de Arousa, na costa de Fisterra a Portodoson (2.800) e de Vigo-A Guarda (2.000). O resto da rexión queda por baixo de 1.300 unidades retiradas por área.
Respecto destes comisos, a consellería volveu a facer un chamamento á cidadanía para que "só compre produtos procedentes das canles legais" porque son "os únicos que contan con todas as garantías para o seu consumo".
Tamén lembrou o "dano que fai a actividade irregular aos profesionais do sector" dada a "importancia socioeconómica que as actividades marisqueiras teñen na Comunidade".
