As exportacións galegas seguen en negativo e acumulan unha caída do 8% no que vai de ano

As exportacións galegas volveron descender en agosto (-0,4%) en comparación co mesmo mes de 2018 ata quedar en 1.656 millóns de euros, segundo os datos que publica este martes o Instituto Galego de Estatística (IGE).

As vendas ao exterior no que vai de ano --entre xaneiro e agosto-- son por un total de 14.041 millóns, polo que xa acumulan un 8% de caída no que vai de ano en Galicia.

Deste xeito, é o sexto retroceso interanual consecutivo en Galicia --o último aumento produciuse en febreiro--, aínda que modera a baixada respecto doutros meses.

O descenso nas exportacións en España é máis acusado en agosto (-6,2%) que en Galicia. Con todo, o avance positivo no oito primeiros meses no Estado (+1,1%) contrasta coa diminución galega.

Os produtos con maior repercusión negativa nas exportacións galegas de agosto foron os aparellos e material eléctrico (-2,1 puntos), mentres a mellor evolución foi para os combustibles e aceites minerais (+2,3 puntos). No transcorrido de 2019, as vendas de automóbiles protagonizan a caída (-4,3 puntos), seguidos de combustibles (-2,3 puntos).

En agosto, as expedicións dirixidas á UE baixan un 0,3% (son o 77,3% do total). Países Baixos (-54,3%) está á cabeza do recorte, mentres hai ascensos en países como Francia (+17,2%) e Portugal (+7%). Fóra de Europa, destaca o aumento das destinadas a Estados Unidos, fronte a mingua a Turquía.

BAIXAN AS IMPORTACIÓNS EN AGOSTO

En agosto, as importacións baixan un 2,5% de forma interanual e quedan en 1.353 millóns, cun descenso marcado polos combustibles (-4 puntos) e peixes (-2,9 puntos).

Na comparativa entre os oitos primeiros meses de 2018 e 2019 hai unha alza do 2,6% (12.888 millóns). Vehículos (+1,2 puntos), maquinaria (+1,1 puntos) e aparellos eléctricos (+0,9 puntos) representan as maiores achegas positivas.

O peso de Galicia no conxunto de España en agosto está no 8,5% no total de exportacións (-0,4%) e o 5,8% nas importacións (-2,5%).

Planta de PSA Peugeot Citroën en Vigo. EUROPA PRESS - Arquivo | Fonte: Europa Press