A sociedade galega padece máis casos de Dano Cerebral Adquirido que a media estatal

Case 49.000 galegos padecen Dano Cerebral Adquirido (DCA), o que supón un 4,4% da poboación galega e sitúa a Galicia por enriba da media estatal, que ascende ao 3,6% dos cidadáns, con ao redor de 655.000 afectados, segundo revela o estudo 'Coñecemento do DCA na Sociedade Española', realizado pola Fundación Gmp, a empresa de estudos de mercado GFK e a Plataforma Española polo Dano Cerebral Adquirido.

O informe, presentado este xoves polo vicepresidente da Plataforma Española polo DCA, Francisco Fernández, a representante de GFK España, Lola Rodríguez, e o xerente da Asociación de Dano Cerebral 'Alento' de Vigo, Gonzalo Mira, ten o obxectivo de medir a notoriedade do DCA entre a poboación española, así como analizar a percepción da gravidade da lesión, principais consecuencias e causas da mesma.

Tal como explicaron, o DCA é unha lesión producida de forma súbita no cerebro, polo que non é unha discapacidade de nacemento non dexenerativa e o 65% dos casos de DCA son debido a accidentes cerebrovasculares (ictus).

Segundo os resultados do estudo, a sociedade galega padece máis DCA que a media española, xa que os galegos representan o 6% da poboación nacional, mentres que as persoas con Dano Cerebral Adquirido en Galicia en comparación con España supoñen o 8%.

O perfil medio dunha persoa con DCA son homes, xa que o 65% o son, cunha idade media de 59 anos, que sufriron un ictus aos 52 anos.

Sobre o coñecemento do DCA, o 17% dos enquisados afirmou que sente "moi informado" sobre esta patoloxía, mentres que catro de cada dez "pouco". Porcentaxes que en Galicia melloran a media española, xa que o 23% dos galegos coñecen o tema e só tres de cada dez perciben estar pouco informados.