Coque Malla presentará na Coruña o seu novo disco '¿Revolución?'

"¿Aún crees en la revolución? ¿Aún sueñas con cambiar las cosas?". Con estas dúas preguntas arrinca Coque Malla (Madrid, 1969) o seu novo disco de estudo, '¿Revolución?' (Warner Music, 2019). Así, entre interrogantes, deixando aberto o título, o significado e as posibles diferentes vías para levala a cabo. A xira de presentación pasará pola Coruña, entre outras localidades da xeografía española.

"Pode ter tamén un sentido irónico, como unha maneira de dicir que vexo a revolución bastante pouco probable", apunta con medio sorriso o músico madrileño quen, en calquera caso, asegura que o disco non ten un ton "tan tráxico".

E explica: "Hai unha pregunta á que lle segue unha resposta bastante pesimista. Necesitamos unha revolución ou un cambio profundo que nos faga a todos un pouco máis felices ou que nos faga ter unha vida máis digna... Porque o da felicidade é bastante relativo".

Tras lanzar esta idea, aclara que o disco é "bastante positivo porque, aínda que a revolución sexa imposible, hai unha chea de cousas que fan que mereza a pena vivir". Por iso a segunda canción é 'Nos queda la música', que está aí aínda que "non sexa posible a revolución".