Por Europa Press / Redacción | SANTIAGO DE COMPOSTELA | 28/10/2019 | Actualizada ás 19:50
A presidenta da Deputación de Pontevedra, Carmela Silva, non comparecerá un ano máis no Parlamento galego (onde non acudiu nin en 2017 nin en 2018) para presentar os orzamentos do ente provincial. Así llo trasladou Silva nunha carta remitida este luns ao presidente da Cámara galega, Miguel Santalices, na que volve apelar á "autonomía local" e sinala que as contas serán expostas no pleno do ente provincial do próximo 5 de novembro.
A comparecencia de Silva estaba prevista, xunto á dos máximos representantes das outras tres deputacións, para este xoves 31 de outubro.
Na carta a Santalices, a responsable do organismo provincial pontevedrés argumenta que, "en atención ao principio de autonomía local, as entidades locais non están supeditadas aos parlamentos autonómicos".
Alude á Constitución española e a un ditame do Consello de Estado e reivindica a autonomía local como "pedra angular da totalidade da lexislación básica e de réxime xurídico das entidades locais".
Por último, aproveita para sinalar que, "na procura do acordo e do consenso", estaría "encantada de poder reunirse co presidente da Xunta de Galicia, para trasladarlle a urxencia de realizar a transferencia dos servizos que presta a Deputación que non son competencias propias nin delegadas".
Segundo Silva, estes servizos "ascenden a máis de 16 millóns de euros" que, subliña, "poderíanse dedicar a garantir máis recursos para a cidadanía na provincia de Pontevedra".
O RESTO SI COMPARECERÁ
Pola súa banda, si comparecerán na Cámara os presidentes das deputacións da Coruña e Lugo, tamén presididas polo Partido Socialista, e o de Ourense, o popular Manuel Baltar.
Deste xeito, un ano máis, Valentín González Formoso, volverá comparecer na Cámara galega para dar conta do orzamento da Deputación da Coruña en referendo da disposición adicional terceira do Estatuto de Autonomía de Galicia.
En concreto, este punto sinala que "a Xunta coordinará a actividade das deputacións provinciais de Galicia en canto afecte directamente o interese xeral da comunidade autónoma, e para estes efectos uniranse os orzamentos que aquelas elaboren e aproben ao da Xunta de Galicia".
Pola súa banda, este xoves será a estrea do titular da Deputación de Lugo, José Tomé, no Pazo do Hórreo, tras a súa chegada á presidencia da institución provincial lucense, cargo que foi ostentado na última lexislatura polo alcalde da Pontenova, Darío Campos.
Aínda que Darío Campos si acudiu a render contas ao Lexislativo galego en 2018, en 2017 secundou o plante de Carmela Silva e non compareceu na comisión de economía, facenda e orzamentos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.