Por Galicia Confidencial | Ourense | 04/11/2019 | Actualizada ás 12:06
Activistas da Mesa pola Normalización Lingüística de Ourense interromperon o pleno do Concello de Ourense con letreiros onde se podía ler “Eu quero galego” para denunciar que o alcalde só usa o galego para “aldraxalo e desprestixialo” e criticalo polos eu "autoodio" como galego. Unha acción que lles valeo ser desaloxados da sala.
Durante a protesta, os activistas lembráronlle ao alcalde e ao grupo de goberno as súas obrigas legais respecto á lingua, entre elas a de promover o seu uso normal por parte da administración local, así como uso legal da toponimia da cidade, Ourense. Como resultado desta acción o pleno que comezou en castelán coa lectura da orde do día por parte do Alcalde e continuou en galego após se despregaren os letreiros, segundo informa A Mesa nun comunicado.
O responsábel da Mesa en Ourense, Manuel Carniceiro, advertiu ao alcalde de que a entidade de defensa da lingua non consentirá a actitude de desprezo ao galego que mantén Jácome, e que voltará ao pleno e continuará as protestas mentres o alcalde manteña esa actitude. “O rexeitamento da lingua galega como sinal máis característico de Ourense, unha das principais capitais galegas, é unha mensaxe de autoodio, un exemplo de desprezo polo propio da principal referencia institucional da cidade”.
"A Mesa voltará todas as veces que cumpra para facer valer as obrigas que ten Xácome cara ao noso principal sinal de identidade", apunta esta organización. Ademais, o responsábel da asociación polo galego en Ourense, recomendoulle ao rexedor a aplicación da Guía para o uso do galego na Administración local (2019-2023) editada pola entidade e enviada a todas as concelleiras e concelleiros eleitos no pasado mes de maio, incluído o propio Xácome.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.