Feijóo pide unir o voto no PP para que "se recuperen os compromisos" con Galicia
Advirte que, co actual Goberno de Sánchez, o país non está "blindado" ante unha nova crise: "España non aguanta máis incerteza".
Por E.P. | PONTEVEDRA | 04/11/2019 | Actualizada ás 14:53
O presidente da Xunta e líder do PPdeG, Alberto Núñez Feijóo, chamou este luns a unir o voto no PP para que "se recuperen os compromisos" con Galicia. Tras incidir en que a comunidade necesita un goberno como o autonómico, remarcou que os galegos tamén precisan dun Goberno de España "que se tome en serio" Galicia.
Non en balde, esgrimiu que é tempo non de seguir "agravando os problemas", senón de buscar solucións. "España non aguanta máis incerteza nin equivocacións", remarcou, antes de subliñar que ou hai un cambio de goberno ou o que se transformará será "o crecemento pola desaceleración, a creación de emprego por desemprego e a fortaleza industrial pola debilidade".
Así o trasladou nun almorzo con empresarios en Pontevedra, no que garantiu que Galicia vai seguir "cumprindo cos galegos, achegando estabilidade e certezas, e defendendo os seus intereses". Para Feijóo, "os titubeos do Executivo central fan que España estea nunha encrucillada".
Ao seu modo de ver, España vive "nunha continua campaña electoral que ten repercusións", unha situación que "non é recomendable para un país que ten que facer fronte a tantos desafíos". "Oxalá coas eleccións do 10 de novembro acabe verdadeiramente a campaña electoral", afirmou, engadindo que o país "non debe perder tempo, diñeiro, nin forzas ante todo o que temos por diante.
Neste sentido, recoñeceu que España "ten capacidade" para dar "mellores respostas" das que, "desde a ausencia de Goberno", están a darse aos españois e, especificamente, aos galegos. Ao tempo, advertiu que, ante as ameazas dunha nova crise, España "non está blindada" porque ten un Executivo "débil" que "se negou a gobernar todos estes meses".
"UN GOBERNO QUE GOBERNA"
No polo oposto, Feijóo situou ao PP como "única" alternativa e exemplificouno co caso de Galicia, onde el lidera o Executivo con maioría absoluta, e que identificou como "sinónimo de cumprimento do deber, responsabilidade e estabilidade", así como tamén "dun goberno que goberna".
Finalmente, censurou os "incumprimentos" do Executivo estatal, co foco da débeda "de 700 millóns", dos que só se compromete a abonar os 330 millóns das entregas a conta, ou dos prazos do AVE, así como na "baixada de investimentos" do único borrador de orzamentos presentado polo Executivo de Sánchez.
