Por Europa Press / Redacción | Ferrol | 04/11/2019 | Actualizada ás 19:55
A ministra de Defensa en funcións, Margarita Robles, asegurou que o bloqueo político de PP, Ciudadanos "e outras forzas" á hora de formar goberno motivou a imposibilidade de conseguir "investimentos" para o naval de Ferrol.
Robles pronunciou estas palabras durante a súa visita a Ferrol, onde estivo acompañada polo líder do PSdeG, Gonzalo Caballero; o alcalde da cidade, Ángel Mato, e a secretaria xeral socialista en Ferrol, Beatriz Sestayo.
Alí, cuestionada sobre a situación do naval en Ferrol, a ministra de Defensa manifestou que as "limitadas" funcións do Executivo que encabeza Pedro Sánchez impediron lograr "investimentos" para o sector.
"Pídolle ao Partido Popular que sexa valente e que explique agora porque tiña paralizado ese proxecto", aseverou en alusión ao contrato das fragatas F-110, que está previsto construír nos estaleiros de Navantia na ría de Ferrol para a Armada Española.
"O compromiso do Goberno con Ferrol púxose en marcha, está en marcha e só vai continuar con seriedade e rigor se hai un Goberno do Partido Socialista", sentenciou Robles.
APOIO A NAVANTIA
A responsable do PSOE incidiu en que "fai falta un Goberno serio, crible, estable, que fale pouco e que cumpra; e iso só o pode ofrecer o Partido Socialista".
A responsable de Defensa destacou que o PSOE apoiará Navantia "en todo o que sexa necesario" ao ser interpelada sobre a posibilidade de que o Goberno que saia das próximas urnas poida adiantar o inicio da construción das F-110, previsto para 2022.
"Pero os prazos tenos que dicir Navantia, porque isto é un tema técnico, non cabe facer demagoxia con este asunto, téñense que facer estas fragatas con seriedade, rigor e o PSOE e o Goberno, se nos dan a confianza os cidadáns, apoiaremos Navantia, como o fixemos, con realidades".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.