Por Galicia Confidencial | Compostela | 07/11/2019 | Actualizada ás 15:05
De nacionalismos e ultradereita ou de estremos opostos pero converxentes. O presidente da Xunta, Alberto Núñez Feijóo, quixo equiparar estas dúas tendencias políticas para desacreditalas publicamente porque, veu dicir, benefician a sectores determinadas. E o fixo tras as duras críticas de Santiago Abascal, o líder de Vox, que o acusou de ser "nacionalista" e de defender "a nación histórica de Galicia" durante o debate a cinco do pasado luns.
"Galicia é unha nacionalidade histórica porque así está recollido na Constitución desde 1978. Dicir outra cousa é mentir e manipular as miñas palabras e non é a primera vez que o fan", respostou Feijóo na rolda de prensa posterior ao Consello da Xunta na que criticou duramente a Vox, e de paso ao BNG, por servir de "instrumento" ao PSOE.
Así, e tras a acusacións de Abascal que case o comparou cun perigoso "nacionalista", Feijóo lembrou que "se hai un sitio onde se parou o nacionalismo" ese foi Galicia. "A que se refire con parar o nacionalismo?", preguntouselle despois. "Pois que aquí en Galicia nunca gañaron os nacionalistas como si o están facendo en Cataluña ou no País Vasco", dixo. E aínda foi máis cotundente utilizando ao BNG para atacar a Vox: "Se hai un modelo para parar o nacionalismo ese é o de Galicia", suliñou en alusión ao PP.
EVITA FALAR DUN PACTO PP-VOX
Con todo, foi moi evasivo ao ser preguntado se rexeita un acordo entre Vox e o PP --que xa gobernan en varias autonomías e concellos-- se os seus votos, xuntos cos de Cs, dan para gobernar. Preguntado ata en dúas ocasións evitou responder de xeito contundente. "E se os precisa para gobernar en Galicia, que faría?", preguntoulle GC. "Se o que están decindo nos mitines é que queren acabar con Feijóo", respondeu sen aclarar se haberá pacto coa ultradereita.
"Ademais", engadiu, "prefiro falar de partidos que teñan representación en Galicia que non é o caso". E engadiu: "Galicia non está aínda en campaña. Está gobernada e está preservada das frivolidades políticas ás que nos someteron o conxunto dos españois desde hai dous anos".
No que si se estendeu Feijóo foi nas súas críticas a Vox por ser, dixo, "un instrumento" ao servizo do PSOE. "Está claro que a estratexia do PSOE é que se fale de Vox, porque canto máis se fale deles, mellor lle vai ir ao PSOE", suliñou. Por iso, insistiu en que votar a Vox ou Cs é "votar polo PSOE" porque "divide o voto da dereita".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.