Bota a andar a Comisión Galega de Enfermidades Raras
A súa función será coordinar a atención e participar no desenvolvemento do rexistro destas patoloxías.
Por Europa Press / Redacción | SANTIAGO DE COMPOSTELA | 07/11/2019 | Actualizada ás 19:27
O Consello da Xunta aprobou o decreto polo que se crea e regula a Comisión Galega de Enfermidades Raras, co fin de coordinar a súa atención e participar no desenvolvemento do seu rexistro, que comezou a funcionar en xaneiro.
Pola súa banda, prevese que o plan galego de atención a estas patoloxías se presente no primeiro trimestre de 2020, co fin de dar resposta ás necesidades duns 200.000 afectados.
A comisión galega estará formada por profesionais do ámbito sanitario e social. En concreto, será persoal médico, farmacéutico, de enfermaría, un experto en xenética, un traballador social e un representante das asociacións de pacientes.
Desde que en xaneiro deste ano se publicou o decreto polo que se crea o rexistro galego de enfermidades raras rexistráronse máis de 1.600 pacientes afectados.
