En Marea urxe ao PSOE a apostar por un goberno "progresista" que "peche a porta" a outras eleccións
Di que pode ser un exemplo para construír unha "alernativa" progresista nas galegas.
Por E.P. | SANTIAGO DE COMPOSTELA | 11/11/2019 | Actualizada ás 00:03
En Marea pediu constituír "xa" un goberno "progresista" que desbloquee a situación política e "peche a porta" á posibilidade dunhas terceiras eleccións. Así se pronuncia esta formación a través dunha nota de prensa na que se reivindica "coa lexitimidade" que lle dá "adoptar a decisión de non concorrer puntualmente" a esta cita electoral "para evitar un fraccionamento do voto progresista galego que puidese propiciar o avance das dereitas en Galicia".
Neste escenario, fai "os chamamentos necesarios para facer valer, nesta ocasión si, os resultados", co obxectivo de que "se escoite a decisión da cidadanía". "Especialmente" refírese ao líder do PSdeG, Gonzalo Caballero, e ao do PSOE, Pedro Sánchez, de quen di que "deben decidir inequivocamente en que bando xogan, se no do progreso social ou no do tacticismo partidario que fai avanzar á extrema dereita".
Sobre o horizonte electoral galego, avoga por "construír unha alternativa capaz de derrotar a Feijóo e abrir unha primavera social e galeguista en 2020, que atenda ás emerxencias feminista, ambiental e social que vive o país".
Por último, interpreta que o resultado electoral "evidencia que a plurinacionalidade no estado é unha realidade sociolóxica e electoral, e que a gobernabilidade progresista pasa polo recoñecemento desa realidade democrática".
