O PSOE de Ourense non participará no debate do estado da provincia por ser "unha pantomima de Baltar para enxalzarse"

O PSOE de Ourense confirmou que non participará no debate do estado da provincia que se celebrará este mércores na Deputación. O portavoz socialista no pleno, Rafa Villarino, critica que "é unha pantomima" do presidente provincial, Manuel Baltar, para "enxalzarse a si mesmo".

Pleno da Deputación de Ourense.

O tamén secretario provincial do PSOE avanza que demandará a supresión deste debate mediante unha moción que se debaterá na próxima sesión ordinaria. E é que, segundo os seus datos, durante o mandato 2015-2019 o 87 por cento das propostas de resolución aprobadas están "sen cumprir".

Iso evidencia, segundo os socialistas, que a xestión do PP "está a levar a Ourense ao desastre e á disolución". Neste sentido, aseguran que "desde que a familia Baltar ocupa" a Deputación, agora "co aplauso" do alcalde da capital e líder de Democracia Ourensana, Gonzalo Pérez Jácome, a provincia "perdeu sete habitantes cada día".

Eles dous son "responsables directos do estado catastrófico dunha provincia que agora estenden á cidade, con propostas como dous parques acuáticos, un mapamundi, un edificio intelixente que agora é itinerante, porque xa o pasearon por tres localizacións distintas, ou un rañaceos", enumerou.

"Nós estamos para acabar con ese debate falso e estéril, como ben dixo o propio Jácome cando pedía a súa eliminación no ano 2017 chamando tolo e psicópata a unha persoa da que agora é amigo", lembrou Villarino.