A Federación Española de Municipios recoñece a Deputación de Pontevedra como unha referencia en política cultural

A presidenta da Deputación de Pontevedra, Carmela Silva, participou este martes na xornada da Federación Española de Municipios e Provincias (FEMP) sobre '40 anos de políticas culturais locais', celebrada no Palacio de Congresos de Toledo, despois de que a administración provincial fose seleccionada xunto coa de Palencia e a Consellería de Cultura e Deportes de Castela-A Mancha para explicar o seu modelo de cultura "transversal e transformadora da sociedade" no cumprimento dos Obxectivos de Desenvolvemento Sustentable (ODS) da ONU.

Desta maneira, tal como explica a Deputación, a provincia de Pontevedra foi recoñecida neste foro como unha referencia de "boas prácticas" dentro da administración local española.

Durante toda a xornada, reflexionouse sobre a estreita relación entre as políticas culturais e o cumprimento dos ODS cos que, en palabras de Silva, "se pretende construír un mundo máis humano".

Para a presidenta, axudar a cumprir os ODS é "unha vocación irrenunciable" da Deputación e a cultura é unha das ferramentas para conseguilo. Tal como engadiu, os 17 obxectivos aprobados pola ONU serven de "principios reitores" para a elaboración dos orzamentos provinciais e como "principios avaliadores" da eficacia do gasto público.

"A cultura accesible, participativa e feita para romper barreiras é un dos mellores camiños para unha sociedade máis xusta, máis igualitaria, apoderada e, por tanto, integrada", subliñou Carmela Silva este martes en Toledo.

Silva puxo tamén o acento en que a cultura "impregna todo o territorio dunha provincia que está a vivir unha transformación en vilas e cidades que hoxe abren espazos urbanos ao encontro cidadán, que converten rúas e prazas en teatros ou salas de exposicións ao aire libre, onde se restauran edificios e se constrúen equipamentos que funcionan como colectores culturais ou referencias en si mesmos".

"Cultura tamén é alzar a voz para reducir o uso dos plásticos, promocionar os nosos espazos naturais, defender o uso sustentable dos nosos montes, das rías e apostar por un turismo que vaia máis aló do sol e da praia, que se centre nos nosos festivais musicais, na etnografía, na paisaxe e na gastronomía", reivindicou.