Por X.M. Fernández | Ourense | 14/11/2019 | Actualizada ás 10:00
O Ciclo “Cata a Arte”, que este ano chega á súa 6ª edición, complementa as presentacións de viños da D.O. Ribeiro con actuacións culturais. Este xoves tócalle a quenda ao coñecido actor e humorista Alberte Montes que ten a misión de amenizar a ‘post-cata’ cun breve monólogo no que dará pautas e consellos para ser un ‘galego top’. Alberte foi un dos actores na exitosa serie “Fariña” e actualmente está compaxinando a rodaxe dunha serie para a TVG con aparicións no programa Luar.
Os viños que se presentan este xoves 14 de novembro en “Cata a Arte” son Catro Parroquias e Viña Leda de Bodegas Loeda S.L., adega localizada no lugar de Sampaio, en Ribadavia, fundada nos anos 20 e pola que pasaron xa tres xeracións. Actualmente a súa produción rolda os 200.000 litros, dos que 60.000 van para embotellar o Catro Parroquias. O principal mercado é Galicia pero tamén se distribúe a nivel nacional co envío de pequenas partidas ao mercado asiático e a Suíza.
Catro Parroquias está elaborado principalmente coa variedade Treixadura, e un dos feitos diferenciais que ten é que para a súa elaboración recóllese uva das antigas catro parroquias do Ribeiro.
O evento terá lugar o xoves 14 de novembro a partir das 20.00 horas, momento no que se abrirán as portas para acceder ao salón correspondente do Centro Cultural Marcos Valcárcel de Ourense onde se desenvolverá esta acción. As catas teñen tamén un carácter solidario, co cal a pequena aportación económica da entrada irá destinada a recadar fondos para Cáritas Diocesana de Ourense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.