Por Europa Press / Redacción | SANTIAGO DE COMPOSTELA | 13/11/2019 | Actualizada ás 18:47
Expertos propoñen unha "profunda transformación" da Atención Primaria en Galicia, na que aposta por que deixe o papel de porta de entrada ao sistema sanitario para ser "o eixo vertebrador do mesmo". Así o pon de manifesto no documento estratéxico e de xestión elaborado por 16 expertos en Atención Primaria independentes titulado 'Por unha Atención Primaria vertebradora do sistema de saúde' presentado este mércores na sede do Sergas.
O documento realizado polo grupo de expertos concibe tres velocidades --curto, medio e longo prazo--, cunhas medidas urxentes para realizar o próximos seis meses, outras en dous anos e outras en catro.
Segundo explicou a Consellería de Sanidade, no documento "trátase de reorientar o sistema de saúde cara a unha cuádrupla meta: mellorar a saúde poboacional, así como a calidade e a experiencia do paciente; e incrementar a eficiencia e a satisfacción dos profesionais".
Entre as medidas urxentes, o documento presentado propón mellorar as condicións de traballo e o acceso dos postos asistenciais; corrixir a sobredemanda nalgúns centros de saúde; configurar as funcións dos profesionais sanitarios responsables dos servizos de primaria; ou sentar as bases da realización dos plans locais de saúde.
Tamén aposta, entre outras medidas urxentes, por elaborar un plan de substitución xeracional de profesionais a nivel de cada área sanitaria; estandarizar os procesos asistenciais incluídas as probas complementarias, e potenciar as competencias do persoal de enfermaría. Así mesmo, propón o documento reforzar a actividade formativa e investigadora en Atención Primaria e desenvolver un proxecto xeral dirixido á cidadanía.
"GARDIÁN"
Na presentación, o exconselleiro de País Vasco Rafael Bengoa, coordinador do grupo de expertos que o elaborou, cualificou o documento de "estratéxico", que aposta por accións "complexas" para ter "esta Atención Primaria vertebradora do sistema". Fronte ao envellecemento da poboación, Bengoa asegurou que a única forma é "reforzando a Atención Primaria" para "facer sustentable o sistema".
Outro dos coordinadores, o médico de familiar Jordi Varela, insistiu en que a Atención Primaria "non pode seguir sendo o gardián do sistema, senón que debe ser o vertebrador". "Ten que reforzarse", abundou, para engadir que "se faga un plan para cada territorio" con "estratexias locais que teñan sentido". "Ou se reforza co traballo de equipo ou non vai a ningunha parte", apostilou.
Entre as medidas a medio prazo inclúese ampliar a carteira de servizos nos centros de saúde; potenciar as prácticas clínicas de valor ou crear un foro de centros de saúde para compartir experiencias.
CRÍTICAS DE SOS SANIDADE PÚBLICA
Pola súa banda, a Asociación Galega para a Defensa da Sanidade Publica e a plataforma SOS Sanidade Pública --que asistiu a esta presentación-- cualificou de "inaceptable e irresponsable" este acto, xa que "parece destinado a condicionar e interferir o traballo elaborado por numerosos profesionais e traballadores" para presentar un documento "consensuado".
Nun comunicado, mostra o seu "malestar" pola presentación deste documento tras seis meses con 15 comisións sectoriais, "con 206 persoas", para elaborar unha proposta co fin de "desbloquear a deterioración e conflito" na Atención Primaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.