Risco en Galicia por neve, choivas, frío vento e ondas para este venres
En Lugo continuarán suspendidas as clases en varios centros da provincia ante a acumulación de neve.
Por Europa Press / Redacción | MADRID | 15/11/2019 | Actualizada ás 09:29
As catro provincias galegas estarán este venres en aviso de risco e risco importante por fenómenos meteorolóxicos como temperaturas mínimas, neve, choiva, forte vento e ondada.
Segundo a predición da Axencia Estatal de Meteoroloxía (AEMET), durante a xornada prevense nevadas importantes en áreas montañosas do norte peninsular, especialmente na cordilleira Cantábrica, e espéranse precipitacións persistentes e localmente fortes no Cantábrico. Ademais, será unha xornada na que as temperaturas serán significativamente baixas no Pirineo.
Para este venres, a cota de neve oscilará entre os 900 e 1.000 metros en Baleares; no sur peninsular entre os 1.000 1.200 metros, baixando a entre 700 e 900; e no resto da Península e Galicia estará entre os 700 e 900. A neve porá en aviso de nivel amarelo por risco a Ourense; de nivel laranxa por risco importante a Asturias, León, Cantabria e Lugo. De feito, en Lugo continúan sen clase en varios concellos da provincia.
Con respecto ás temperaturas, producirase un descenso, provocando que os valores sexan significativamente baixos en Pireneos. Tamén se esperan xeadas nos sistemas montañosos peninsulares, meseta Norte e leste da meseta Sur, xeadas que nos Pireneos poderán ser localmente fortes.
Por último, prevese que sopre vento forte ou se produzan intervalos de vento forte do norte no litoral galego e do Cantábrico occidental; espérase vento do oeste no litoral do Cantábrico oriental, contorna do mar de Alborán, Baleares e puntos do litoral mediterráneo oriental; vento do nordés en Canarias; e vento do oeste ou do noroeste no resto do país.
