Sanidade destaca as melloras no calendario de vacinas, ás que destinará 16 millóns

O conselleiro de Sanidade, Jesús Vázquez Almuiña, destacou este mércores no Parlamento de Galicia as melloras introducidas no calendario de vacinas, ás que a Xunta destinará 16 millóns de euros. Así o manifestou en resposta a unha pregunta formulada pola deputada Marta Rodríguez Bispo no pleno, no que se referiu ao calendario galego como "un dos máis completos do mundo".

Entre as melloras introducidas, Almuiña destacou que desde o 22 de xullo se substituíu a vacina bivalente fronte ao virus do papiloma humano (VPH) pola nonavalente, que aumenta a protección fronte aos cancros que provoca este virus.

Así mesmo, indicou que, desde a mesma data, ampliáronse os grupos de risco que se poden beneficiar das vacinas existentes no mercado, como no caso da do papiloma humano, que incrementou o seu uso aos novos grupos de risco e, en todos os casos ata os 45 anos. O investimento nestas auméntase nuns 2,3 millóns.

O conselleiro tamén informou de que este ano se aprobaron cambios na vacina antimeninxocócica. Así, pasouse a usar unha tetravalente en poboación preadolescente, aos 12 anos, en lugar da vacina monovalente. As melloras introducidas nesta levan aparellada un investimento de 590.000 euros entre 2019 e 2020.

Ademais, en canto á campaña da gripe, Vázquez Almuiña afirmou que o Sergas emprega as mellores vacinas antigripais dispoñibles, para o que investirá 1,3 millóns máis que o ano pasado.

Por último, informou de que desde o luns desta mesma semana introduciuse a vacina fronte ao rotavirus para os nenos prematuros, nacidos entre a semana 27 e 32 de xestación. Esta medida supón un incremento de case 150.000 euros por ano.

COCIÑA DO CHUO

No pleno da Cámara galega, ademais, o conselleiro volveu sinalar que o Servizo Galego de Saúde creará cinco novos postos de traballo para a cociña do Complexo Hospitalario Universitario de Ourense (CHUO).

En resposta a unha pregunta formulada pola deputada do Grupo Común da Esquerda Eva Solla, que esixía á Xunta garantir o número de profesionais por categoría, Almuiña insistiu deste xeito en que non se van perder prazas desempeñadas por persoal estable, senón que se van crear catro novos empregos para profesionais titulares en Dietética e Nutrición e outro dun cociñeiro a maiores da dotación actual.

Ademais, indicou que todos estes postos serán dotados de forma estable conforme á normativa de selección e provisión vixente.

MORTE XESTACIONAL E PERINATAL

O conselleiro de Sanidade ratificou este mércores que o seu departamento finalizou a elaboración da Guía de atención no proceso de morte e dor xestacional e perinatal, que suporá "unha clara mellora da calidade asistencial" neste doloroso proceso.

A guía, que incorpora as recomendacións do Consello Galego de Bioética, é, segundo o conselleiro, un documento de calado que pretende "mellorar a asistencia nun momento difícil na vida das persoas e familias que sofren esta situación". Segue a liña marcada na Estratexia de Humanización da Asistencia Sanitaria da Consellería de Sanidade.

Almuiña subliñou que a guía ten como obxectivo "homoxeneizar a atención profesional" nestes casos e proporcionar "ferramentas útiles" aos profesionais involucrados na atención no proceso de morte xestacional ou perinatal, orientando os coidados e facilitando a súa adaptación ás necesidades de cada muller, e a súa parella e familia.

Tamén proporcionará información para unha atención máis humanizada que "favoreza un ambiente afectivo e empático" para axudar a muller, parella e familia a aceptar a realidade e facilitar o duelo.

O conselleiro asegurou que tamén se "potenciará" a autonomía da muller na toma de decisións, "ofrecendo información veraz e de calidade" acerca das opcións terapéuticas ou xestións a realizar. Todo iso, ademais de "facilitar a continuidade de coidados" entre o persoal de atención primaria e hospitalaria, e previr os transtornos derivados dos loitos patolóxicos e crónicos ou, se aparecen, "darlles o soporte oportuno".