Os galegos gastarán unha media de 219€ neste 'Black Friday'

O 47% dos consumidores galegos afirma que realizará as súas compras o próximo 'Black Friday' unicamente na canle online, mentres que só o 9% o fará de forma exclusiva en tenda física, segundo datos do informe estacional do Observatorio Cetelem, dado a coñecer este venres.

Achega do grao de coñecemento desta data comercial, o estudo, realizado a última quincena do pasado outubro, reflicte que o 97% dos enquisados galegos coñece o que significa ese día.

O gasto medio previsto polos galegos para este 'Black Friday' é de 219 euros. A maior porcentaxe de consumidores de Galicia sitúase no rango de gasto de entre 100 e 300 euros (un 54%), pero tamén hai un 17% que declara ter intención de gastar entre 500 e mil euros.

Segundo o estudo, o 57% dos galegos enquisados ten pensado realizar algunha compra durante o próximo Black Friday (seis puntos por encima da media do país) e un 73% afirma que as compras as realizará como adianto de agasallos de Nadal.

OS MÁIS BUSCADOS

Os produtos con máis intención de compra por parte dos consumidores galegos son: moda (55%), calzado e complementos (46%), e electrodomésticos (39%). A continuación sitúanse os xoguetes (27%) e os produtos de saúde e beleza (24%).

Xente de compras