Partido Popular galego: "A violencia machista non é unha loita de sexos"

A dous días da celebración do Día Internacional contra a Violencia de Xénero, celebrada cada ano o 25 de novembro, o Partido Popular de Galicia sostén que nesta secuela "o inimigo non é home", senón "o maltratador". Os populares galegos pensan que "a violencia machista non entende de estereotipos" nin é unha "loita de sexos", senón unha "batalla entre dous bandos: os que agriden e os que non estamos dispostos a compartir Galicia con eles".

Despois de que tres mulleres fosen asasinadas este ano en Galicia polas súas parellas ou exparellas, segundo recollen os datos oficiais do Ministerio, o PPdeG aproveita o 25N para lembrar que "a erradicación da violencia machista" e "a igualdade" son os "desafíos máis importantes" que se presentan para a nova década en Galicia.

"Non podemos estar plenamente desenvolvidos como sociedade mentres teñamos entre nós persoas convencidas de que as relacións persoais poden ser entendidas desde un prisma de superioridade entre uns e outros por motivos de xénero", reza o seu manifesto. Ao seu xuízo isto é "inaceptable".

Para o partido, os malos tratos ás mulleres é os malos tratos "a todos os galegos". Neste sentido, non o entenden como "un conflito individual", pero tampouco "debe colectivizarse nunha disputa entre xéneros", aseguran.

De todos os xeitos, consideran "imprescindible implicar a todos, homes e mulleres, no combate das prácticas machistas" e actuar como "un dique de contención" fronte ás mesmas.

Esta secuela é "transversal", é dicir, "non entende de estereotipos", está presente "no rural e nas grandes cidades, nos adultos e a mocidade" tamén nos ricos e nos pobres. Require, como "a patoloxía máis complexa, tratamento inmediato e vixilancia continuada".

Para afrontala, os populares destacan o papel da política como "a ferramenta máis útil para cambiar a sociedade", aínda que "non debe de ser a única". Por este motivo, o PPdeG apunta ás iniciativas que impulsou para acabar con "este drama".

Referíronse ás axudas económicas que reciben as vítimas de violencia de xénero, a escolarización dos fillos e fillas destas mulleres, o traballo pola concienciación e un plan que se programa para 2020 que axude ás administracións a "ser máis eficientes detectando casos e evitando novos exemplos de violencia machista".