Por Europa Press / Redacción | CORUÑA, A | 25/11/2019 | Actualizada ás 12:57
A conselleira de Medio Ambiente, Territorio e Vivenda, Ángeles Vázquez, confía en que se reflote o Blue Star "canto antes" e que "non haxa contaminación".
En declaracións aos medios durante unha visita á cidade de Lugo, Vázquez puntualizou que durante todo o fin de semana "estivo a traballarse arreo". Así, asegurou que a Xunta, a través da Consellería do Mar e a de Medio Ambiente, "púxose a disposición do Ministerio de Fomento", que dirixiu os labores do reflote.
"O persoal de Medio Ambiente atópase na ría de Ares e esperemos que ao final non haxa ningunha incidencia, e as toneladas de combustible que ten o barco para o seu mantemento se fagan da mellor forma para que non acaben no mar e non haxa contaminación", desexou.
En canto ao fuel que leva o barco, constatou que se trata dun "bo número de toneladas" --ao redor de 100-- que, no caso de que os traballos non dean o seu froito, "non é un bo agoiro". No entanto, reafirmou que "se está traballando man a man e de xeito conxunto".
Despois de que o armador do 'Blue Star' contratase á empresa Smit Salvage para tratar de reflotar o quimiqueiro, a "prioridade" do Goberno central é baleiralo deste combustible. A conselleira confirmou que aínda "non" se produciu ningunha vertedura e expresou que o seu departamento está "á espera" dunha reunión con Fomento "para unha mellor coordinación".
Sobre os labores para desencallar o buque, Ángeles Vázquez manifestou que "o tempo ten moito que dicir", pero confía que "sexa canto antes, pola seguridade de todos".
PLAN DE REFLOTE
A armadora do 'Blue Star' deberá presentar "ao longo do día de hoxe" os seus plans para a extracción do combustible e posterior recuperación do buque, segundo informou o delegado do Goberno en Galicia, Javier Losada.
En declaracións aos xornalistas, tras participar en acto con motivo do Día da Eliminación da Violencia contra a Muller, sinalou que se está á espera "de que a navieira presente os plans que se lle esixiu para a extracción do combustible que ten o buque e o plan posterior para a súa "extracción ou reflote".
"Ao longo do día trasladaránnolos", apuntou Losada, quen precisou que a empresa xa está a facer "labores de estudo de como está o buque por medio duns submarinistas que contrataron". Ademais, reiterou que medios da Sociedade Estatal de Salvamento Marítimo (Sasemar) e de Marina Mercante están "a controlar todo o dispositivo".
Sobre a empresa que se encargará do reflote do buque, o delegado do Goberno insistiu que "a navieira, dentro do plan de traballo, exporá os medios que quere e queira contratar". "Descoñezo que tipo de buques de apoio vai utilizar", sentenciou a este respecto.
Preguntado se para a retirada do combustible se lle deu un prazo, o delegado do Goberno insistiu en que "ao longo do día de hoxe teñen que presentar un plan de traballo para facer esa extraccion e con todas as seguridades que require extraer o combustible".
Por outra banda, recalcou que están "en alerta" os plans de protección dos portos de Ferrol e da Coruña. "Todo o material que temos nas distintas bases". "E está o Don Inda e outros buques de Salvamento controlados por se é necesario", lembrou.
Por todo iso, instou a deixar que os técnicos "vaian tomando as súas decisións". "E por agora esas decisións son correctas", apostilou.
Por outra banda, confirmou que a secretaria xeral de Transportes do Ministerio de Fomento, María José Rallo, se desprazou ata A Coruña para manter unha reunión no transcurso da mañá na Torre de Control Marítimo para abordar as medidas relativas ao rescate do buque.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.