A Audiencia da Coruña distribúe 51,7 millóns consignados polo 'Prestige' entre 265 afectados, 17 anos despois da traxedia
O Estado español, como principal prexudicado, recibirá 40,6 millóns.
Por Europa Press / Redacción | A Coruña | 26/11/2019 | Actualizada ás 16:21
A sección primeira da Audiencia Provincial da Coruña emitiu unha providencia na que acorda distribuír as cantidades depositadas no órgano xudicial entre os 265 afectados pola catástrofe marítima do 'Prestige', segundo informa o Tribunal Superior de Xustiza de Galicia (TSXG).
En concreto, a Audiencia reparte 51.742.034 euros, dos que 27.199.464 foron depositados polo Fondo Internacional de Compensación de Danos por Hidrocarburos (Fidac).
O resto, 24.542.570 euros, proceden na súa maioría —un total de 22.777.986 euros— da aseguradora do buque, The London Steamship Owners Mutual Insurance Association (The London P&I CLUB) e, o resto, da venda do fuel recuperado do petroleiro.
En concreto, as cantidades depositadas polo Fidac repartiranse entre os prexudicados que non recibiron indemnización deste fondo, "proporcionalmente ao principal do crédito polo que se despachou execución no auto de de marzo de 2019", sinala a provindencia.
Exceptúanse as contías correspondentes ao Estado español e ao francés, a quen se entregarán as cantidades que constan nos escritos do Fidac, de abril de 2019 e xullo deste mesmo ano, "por tratarse de pagos parciais", segundo precisa a Audiencia.
Outros 24,5 millóns, resultante da suma de 1,7 millóns correspondentes ao importe da venda do fuel recuperado por Repsol —dos 2.121.084,15 euros ingresados, dedúcense 356.000 polos custos de tratamento— e os 22,7 millóns depositados pola aseguradora, distribuiranse entre todos os prexudicados.
REPARTICIÓN PROPORCIONAL
Respecto diso, o TSXG explica que os fondos se reparten proporcionalmente, segundo as indemnizacións recoñecidas, entre o Estado español, como principal prexudicado, que recibirá 40.671.748 euros; o francés (9.265.515 euros), a Xunta de Galicia (202.472 euros) e outros 262 afectados pola vertedura que son particulares, empresas, mancomunidades, concellos e sociedades.
A Audiencia estableceu o principal de execución de sentenza en 1.441.562.943 (sen contar os 392.923.977 de intereses moratorios; 87.144.811 de intereses procesuais; e 573.797.973 de intereses, costas e gastos de execución).
