Por E.P. | SANTIAGO DE COMPOSTELA | 26/11/2019 | Actualizada ás 19:11
O duplicado do carné de conducir —en caso de extravío, deterioración, roubo ou cambio de domicilio— poderá solicitarse a partir de decembro nas xestorías galegas. Este martes, a presidenta do Colexio oficial de Xestores Administrativos de Galicia, Pilar Otero Moar, e a xefa provincial de Tráfico da Coruña, María Vitoria Gómez Dobarro, selaron un acordo para que se poida levar a cabo nas xestorías coruñesas e, "en breve", no resto de Galicia.
O Colexio de Xestores Administrativos apunta que así o cidadán poderá acudir a un xestor administrativo e achegar a documentación establecida pola DXT para o seu duplicado.
Ata a firma deste convenio, o trámite só se podía levar a cabo a través das Xefaturas Provinciais de Tráfico con solicitude de cita previa.
A redución ou eliminación de tempos de espera é o primeiro beneficio derivado do acordo asinado recentemente polo Consello Xeral de Colexios de Xestores Administrativos de España, ao que esta semana se adheriu o Colexio de Xestores Administrativos de Galicia.
PERMISOS INTERNACIONAIS DE CONDUCIÓN
No mesmo acto, tamén se deu luz verde para que os xestores administrativos poidan imprimir permisos internacionais de condución. Ata o momento, a única opción era acudir a unha Xefatura Provincial de Tráfico para realizar o devandito trámite.
A este respecto, a presidenta da corporación que agrupa a case 600 profesionais en Galicia, Pilar Otero Moar, explicou que, "con iso se quere axilizar a tramitación dos permisos de conducir internacionais, con aqueles países cos que non hai acordos de reciprocidade, dando resposta á gran demanda de solicitudes que se han incrementando nos últimos anos".
"E é que os cidadáns cada vez viaxan máis ao estranxeiro, por traballo ou por lecer, e desta forma o período de tempo que pasa entre a solicitude do permiso e a data da viaxe é menor", sinalou a máxima responsable do Colexio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.