Case 200 incidencias polo temporal en Galicia

Rexistrouse a caída dun cento de árbores en distintos puntos do país.

Por Galicia Confidencial | Santiago de Compostela | 26/11/2019 | Actualizada ás 19:58

Comparte esta noticia

O temporal con fortes ventos e choiva que afecta este martes a Galicia deixou case 200 incidencias, entre as que se atopa a caída dun cento de árbores e ramas. Segundo informa o 112 Galicia, ademais das caídas de árbores, os traballos dos equipos de emerxencias para atallar situacións de risco, como desprendemento de elementos, sumaron 38 actuacións.

Temporal en Galicia
Temporal en Galicia | Fonte: © Miguel Núñez.

Por provincias, a da Coruña foi na que máis incidentes se rexistraron (85), seguida de Pontevedra (62), Lugo (31) e Ourense (14).

Con todo, ningún dos incidentes dos que tivo constancia o 112 Galicia reviste gravidade, máis aló das dificultades creadas por diversos obstáculos caídos polo vento, así como a aparición de bolsas de auga.¡

Por concellos, na provincia da Coruña, os municipios de Santiago, Oza-Cesuras, Cambre e Outes son os que contabilizan máis intervencións. Mentres, en Pontevedra, sobresaíron por número A Estrada, Cañiza, Valga e Catoira. En Lugo, foron A Pontenova, Pantón e Friol; á vez que en Ourense destaca Castrelo de Miño.

CHOIVA E VENTO

Ademais, ao longo da xornada deste martes rexistráronse intensas choivas en varias zonas. Así, en Rois (A Coruña), acumuláronse 36,8 litros por metro cadrado; en Fornelos de Montes alcanzaron os 36,6, e, en Santiago rexistráronse 30,4.

Pola súa banda, o vento excedeu os 100 quilómetros por hora en varios puntos. A máxima tivo lugar en Penedo  do Galo, no municipio lucense de Viveiro, con 136,4 quilómetros por hora.

Esta xornada de aviso laranxa por ventos e amarelo por choivas provocou diferentes complicacións, como o desvío a Asturias dun avión que facía a ruta entre Palma de Mallorca e Santiago. Ademais, cortouse ao paso dos viandantes diferentes espazos públicos para evitar riscos, como a Alameda compostelá.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta