O gasto en I+D en Galicia, por baixo da media española
O persoal aumenta un 3,6%, tamén por baixo da media estatal.
Por E.P. | SANTIAGO DE COMPOSTELA | 27/11/2019 | Actualizada ás 12:16
O gasto en I+D interna en Galicia aumentou un 3,3% en 2018 ata 590,7 millóns de euros, o que supón tres puntos menos que a media española (+6,3%), segundo os datos que publica este mércores o Instituto Nacional de Estatística (INE). En concreto, o gasto de Galicia en I+D interna en 2018 supuxo o 4% do total en España. A sétima comunidade con maior peso total.
En total, o persoal dedicado a I+D na autonomía en 2018 foi de 10.630 persoas a xornada completa --4.343 delas son mulleres--. Aquí hai unha subida do 3,6% do persoal, un punto menos que a media do Estado.
O gasto en Investigación e Desenvolvemento (I+D) interna ascendeu a 14.946 millóns de euros en 2018 en España, o que supuxo un aumento do 6,3% respecto ao ano anterior. Dito gasto representou o 1,24% do Produto Interior Bruto (PIB), fronte ao 1,21% do ano 2017.
SECTORES
Por sectores de execución, o de empresas representou a maior porcentaxe sobre o gasto en I+D interna, cun 56,5% (o que significou o 0,7% do PIB).
Seguiulle o sector ensino superior, cun 26,4% (o 0,33% do PIB). Pola súa banda, o do sector administración pública supuxo o 16,8% do gasto estatal (o 0,21% do PIB). O 0,3% restante correspondeu ao sector Institucións Privadas Sen Fins de Lucro (IPSFL).
O gasto en I+D aumentou un 9,3% respecto ao ano anterior no sector empresas, un 3,6% en ensino superior e un 0,8% en administración pública.
