O PP rexeita unha moción que pedía aumentar os xulgados exclusivos de violencia machista en cinco cidades

O Partido Popular rexeitou unha moción do Grupo Común da Esquerda que pedía instar o Goberno do Estado a incrementar o número de xulgados exclusivos en materia de violencia machista ata contemplar o seu número nas cinco principais cidades galegas.

A moción foi defendida no pleno da Cámara galega pola deputada do Grupo Común da Esquerda Carmen Santos, quen tamén reclamou reformar as instalacións xudiciais existentes en Galicia para que conten con dependencias separadas e adecuadas para que denunciantes e os menores non se crucen cos acusados.

O texto, así mesmo, pedía facilitar a comparecencia por videoconferencia desde salas anexas no caso das denunciantes, habilitar dependencias de espera para os menores, así como medidas reais para mellorar as condicións laborais e formativas do persoal dos xulgados de violencia contra a muller e do Imelga.

POSTURA DOS RESTANTES GRUPOS

"Se esta iniciativa acode unha e outra vez á Cámara é porque o ritmo non é o adecuado", manifestou a socialista María Pierres, que presentou unha emenda, aceptada polo Grupo Común da Esquerda, para incluír que se facilite tamén a declaración por videoconferencia no caso dos menores.

Tras a intervención da socialista, a popular Paula Prado considerou que debe ser a comisión mixta a que decida cales son as unidades xudiciais que necesita Galicia tendo en conta que "eles saben cales son as necesidades".

Por iso, presentou unha emenda que substituía o primeiro punto da iniciativa formulada polo Grupo Común da Esquerda. Foi precisamente o rexeitamento dos rupturistas a engadir esta modificación a que motivou o voto en contra do PP.

Na sesión, ademais, tanto o portavoz de En Marea, Luís Villares, como a deputada do BNG Noa Presas situáronse a favor das peticións incluídas na moción.