Pasan a disposición xudicial os 11 detidos na operación antidroga do pasado luns en Pontevedra
O operativo tivo lugar no poboado chabolista do Vao.
Por E.P. | SANTIAGO DE COMPOSTELA | 04/12/2019 | Actualizada ás 10:04
Os once detidos este luns nunha operación antidroga conxunta desenvolvida pola Policía Nacional e a Garda Civil en varias localidades pontevedresas pasarán este mércores a disposición xudicial. Segundo confirmaron a Europa Press fontes xudiciais, o pase a disposición xudicial terá lugar no Xulgado de Instrución Número 2 de Pontevedra coa xuíza do Número 1.
Axentes da Garda Civil e da Unidade de droga e crime organizado (Udyco) da Policía Nacional desenvolveron este operativo conxunto que se centrou no poboado chabolista do Vao, no municipio de Poio, pero tamén se estendeu a outras localidades como Pontevedra ou a comarca do Salnés.
Desde o sete da mañá do luns numerosos efectivos da Garda Civil despregáronse no asentamento marxinal do Vao de Arriba onde practicaron rexistros nunha ducia de chabolas. Nestas tarefas contaron co apoio de cans da Unidade Cinolóxica e, á primeira hora, un helicóptero do Instituto Armado sobrevoou a zona para evitar a fuxida dalgúns dos implicados cara ao monte próximo.
Pola súa banda, os axentes da Udyco da Comisaría de Pontevedra interviñeron en Pontevedra nunha tenda de roupa na rúa Virxe do Camiño e nunha vivenda particular da rúa Paseo de Colón. A Policía Nacional tamén actuou en Fontecarmoa, en Vilagarcía, e no municipio da Estrada.
