Por Europa Press / Redacción | SANTIAGO DE COMPOSTELA | 04/12/2019 | Actualizada ás 18:07
A 'zoqueira' galega Elena Ferro resultou gañadora do Premio Nacional de Artesanía 2019 ao conxunto dunha obra consolidada, por conseguir "resignificar" un produto tan tradicional como os zocos de madeira, reinventando o seu uso como complemento de moda a través da innovación.
A cerimonia de entrega dos premios tivo lugar este mércores na sede do Ministerio de Industria, en Madrid, e estivo presidida pola ministra en funcións, Reyes Maroto, acompañada do secretario xeral da Industria e da PEME, Raúl Blanco, e da directora xeral da Fundación EOI, Nieves Olivera.
A importancia da artesanía, destacou o ministerio nunha nota de prensa, "non radica só no seu valor cultural e artístico", senón que supón tamén un sector consolidado na economía española, na que representa en torno ao 2,4% do PIB industrial e un 0,4% do PIB total.
A ministra lembrou que estes premios pretenden "visibilizar o sector da artesanía, aos seus creadores, e recoñecer a súa contribución á sociedade". "Estes premios transmiten a realidade dun sector en continua evolución e permiten dar a coñecer exemplos claros de calidade e innovación, da incorporación de novos deseños e da mellora das técnicas para satisfacer a un consumidor cada vez máis esixente", subliñou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.