Medio Ambiente di que seguirá "facilitando" a creación de parques eólicos

A conselleira de Medio Ambiente, Ángeles Vázquez, declarou este mércores que desde a Xunta seguirán "facilitando a implantación de parques eólicos", pero sempre que "se cumpra a lei". Así respondeu a dirixente ante preguntas dos medios sobre as protestas da plataforma 'Salvemos Ordes' ante a posible implantación dun parque eólico na central térmica de Meirama.

"A postura da Consellería é o cumprimento da lei. É certo que optamos por enerxías renovables e é o camiño que temos que seguir de aquí a un futuro. Estamos ben situados a nivel nacional e europeo e seguiremos facilitando a implantación de parques eólicos para obter enerxía renovable", indicou a conselleira. En canto ao impacto ambiental que podería supor a planta eólica, sinalou que "en función das decisións de carácter técnico, aí estarán os informes favorables ou desfavorables".

NOVAS POXAS

A Cámara galega aprobou este mércores unha iniciativa do PPdeG --só cos seus votos a favor-- para pedir que o Goberno central convoque novas poxas de enerxías renovables, que permitan aumentar a potencia eólica instalada en Galicia.

O BNG e Común da Esquerda votaron en contra, mentres o PSdeG e En Marea abstivéronse, despois de que os populares non aceptasen ningunha das emendas que presentaron todos os grupos da oposición. "Non se pon de acordo, por iso non podemos aceptar as súas emendas", xustificou a deputada popular Marta Nóvoa, quen avisou de que estas poxas deben convocarse "xa", porque o Goberno central "non pode seguir en estado de inacción".

Respecto diso, destacou a "importante oportunidade" que supón para Galicia en "riqueza" e "emprego" as enerxías renovables, unha autonomía que "é a segunda" con maior produción en España. Por iso, asegura que a Xunta "fixo os seus deberes mal que lle pese" á oposición, polo que demanda ao presidente do Goberno central, Pedro Sánchez, que "asuma as súas responsabilidades e non se poña de perfil".

POSICIÓN DOS GRUPOS

Pola súa banda, Antón Sánchez (Común da Esquerda) criticou que a deputada popular "describiu un proceso de colonización do territorio perfecto" en Galicia en favor de multinacionais. "E agora vén aquí a pedir máis torta para esas empresas", lamentou. "Non enganan a ninguén", apostila.

Defende que Galicia "non necesita instalar eólicos si ou si", senón facelo "onde non se agreda a paisaxe e con retorno social", no canto de levar a cabo "tramitacións fraudulentas e feitas a dedo para os seus amigos", en alusión ao ocorrido na serra do Oribio.

Por iso, Antón Sánchez contrapuxo o modelo galego de "expropiar barato" no rural para que "veñan outros a facer os seus negocios", co que sucede en países como Dinamarca, "líder mundial de produción eólica" e cun "retorno social evidente". Remarca que "40.000 daneses" son partícipes dos parques eólicos, dado que o 20% da súa capacidade ten que ser ofrecido ás comunidades locais.

Pola súa banda, Begoña Rodríguez Rumbo (PSdeG) tachou de "broma" que o PP só faga iniciativas para "pór deberes aos outros", a pesar de ter "maioría absoluta para gobernar e xestionar os recursos dos galegos". Así mesmo, a deputada socialista cuestionou a vía de urxencia pola que se tramitou esta iniciativa, á vez que cargou contra o "balance" da Xunta en renovables na última década.

Así mesmo, Noa Presas (BNG) dixo que é un "avance intelectual e cognitivo" que os populares asuman que hai un cambio climático "despois de moitos anos negándoo" e o "primo de Rajoy". A deputada nacionalista reduce a proposición a unha "iniciativa autoexculpatoria" dos populares para buscar a "quen botarlle as culpas do seu fracaso estrepitoso" en enerxía eólica, pero "non tapa a realidade".

"Veñen dicir que é a hostia a produción eólica", queixouse Presas, pero lembra que a Xunta deu marcha atrás a 2.300 megawatts que "xa estaban adxudicados hai 10 anos" por "sectarismo político", o que custou "tres millóns de euros" en procesos xudiciais, a cambio de instalar "menos de 500 megawatts".

Pancho Casal (En Marea) dixo que escoitando ao PP parece que Galicia é un "oasis sustentable", pero "hai moitísimo traballo por diante". O seu grupo presentou unha emenda para que a Xunta apoie proxectos de entidades locais e comunidades de montes para presentar documentos e avais para poxas, co fin de "evitar un novo pelotazo de certos amigos do PP".