Por Europa Press / Redacción | SANTIAGO DE COMPOSTELA | 10/12/2019 | Actualizada ás 17:13
A Confederación Estatal de Sindicatos Médicos en Galicia (CESM) reclama ao Servizo Galego de Saúde (Sergas) o tres moscosos autonómicos retirados durante a crise económica, así como o 24 e 31 de decembro.
Para iso, o presidente de CESM, Ramón Barreiro, dirixiu unha carta á directora de Recursos Humanos do Sergas, Margarita Prado, na que solicita a recuperacións dos tres días de libre disposición autonómicos, que "con motivo da crises económica foron retirados polo RD Lei 10/2012", explica.
Ramón Barreiro argumenta que, tras a finalización da crise, "a Xunta de Galicia recuperou parte das pagas extraordinarias e reactivou os días de libre disposición, recuperándose os seis moscosos que fixa o Estado", polo que considera que "non existe ningunha xustificación para negar aos profesionais sanitarios o goce deses tres días de libre disposición de carácter autonómico".
Segundo explica CESM nun comunicado, o presidente de CESM subliña na súa misiva que "eses tres días concedidos pola Xunta, en realidade corresponden a contraprestacións realizadas pola Administración autonómica, debido a varias conxelacións salariais que os profesionais soportaron nas súas nóminas ao longo dos anos".
Este sindicato médico denuncia, por outra banda, o "agravio que sofre o persoal facultativo do Sergas", ao que "se lle impón traballar" os días 24 e 31 de decembro, "obrigación que ningunha norma contempla", matiza CESM, mentres que "no resto das comunidades autónomas de España o persoal estatutario facultativo está exento de traballar os días de Noiteboa e Noitevella".
CESM esgrime, neste sentido, que "en tanto que o Sergas forma parte do SNS o trato xurídico do persoal estatutario debe ser equivalente en todo o territorio nacional". Ademais subliña no seu comunicado, "que o persoal da Administración xeral da Comunidade autónoma de Galicia tampouco traballa os días 24 e 31 de decembro", polo que solicita que "se exima de traballar ao persoal facultativo do Sergas eses días".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.