Por E.P. | A CORUÑA | 11/12/2019 | Actualizada ás 14:20
O presidente da Xunta, Alberto Núñez Feijóo, instou a "recuperar o tempo perdido" para executar a estación intermodal da Coruña, no acto de inauguración da nova pasarela peonil entre o polígono de Agrela e o centro comercial Marineda City.
Fíxoo nun acto que contou coa presenza da conselleira de Infraestruturas e Mobilidade, Ethel Vázquez, e a alcaldesa da Coruña, Inés Rey, e tras os desencontros entre a Administración autonómica e local durante o goberno da Marea Atlántica.
Se a rexedora aproveitou a súa intervención para reclamar que se sigua "profundando" para mellorar as comunicacións entre os polígonos e demandou "diálogo e colaboración" entre as administracións públicas para abordar os proxectos vinculados ás infraestruturas, Feijóo avogou por "seguir construíndo cidade", en alusión tanto á Coruña como a súa área metropolitana.
Neste contexto, falouse da prolongación da Vía Ártabra ata a AP-9, da que dixo que ofrecerá unha alternativa para acceder á cidade desde Cambre, Oleiros ou Sada de forma máis rápida ou o novo Hospital Público Universitario da Coruña, do que afirmou que suporá "un antes e un despois".
En canto ao plan de transporte metropolitano, a alcaldesa reclamou tamén avanzar en acordos nesta materia, mentres que o presidente da Xunta reivindicou que se trata dun plan que dá "resultados". "Cun bo deseño que hai que intensificar", apostilou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.