Detido tras cometer un roubo mentres a súa parella daba a luz
Trátase dun veciño de Ames que subtraeu un teléfono móbil e 400 euros en efectivo á empregada dunhas oficinas.
Por Europa Press / Redacción | SANTIAGO DE COMPOSTELA | 12/12/2019 | Actualizada ás 16:24
Axentes da área de Investigación da Garda Civil de Milladoiro (A Coruña) detiveron un veciño de Ames por subtraer un teléfono móbil e 400 euros en efectivo á empregada dunhas oficinas mentres a súa muller daba a luz.
Os feitos foron denunciados ante a Garda Civil pola vítima, quen manifestou que o individuo entrara no seu lugar de traballo e, tras sacarlle un coitelo, ameazouna, polo que lle entregou 400 euros que tiña na súa carteira e un teléfono móbil de alta gama.
Tras os datos achegados pola denunciante e a investigación policial, a Garda Civil puido identificar o autor dos feitos, con quen puideron contactar telefonicamente e quen lles afirmou que se atopaba coa súa parella nun hospital de Santiago porque estaba a dar a luz nese momento.
Posteriormente, os axentes comprobaron que "efectivamente a parella do sospeitoso se atopaba de parto mentres sucederon os feitos ilícitos", destacaron as mesmas fontes, pero o individuo "non permanecera no hospital con ela e o seu fillo en ningún momento".
O detido en relación a este roubo con forza foi enviado a prisión tras ser posto a disposición xudicial nos xulgados de Santiago de Compostela.
