Por Europa Press / Redacción | SANTIAGO DE COMPOSTELA | 13/12/2019 | Actualizada ás 14:34
O Goberno galego elaborará en 2020 un segundo plano estratéxico para a Cidade da Cultura que se dedique a definir "os novos retos" deste "proxecto tecnolóxico, cultural e creativo" durante a próxima década.
Xunto a este novo plan, o director xeral de Políticas Culturais, Anxo Lorenzo, tamén anunciou este venres que se procederá á redacción dun informe "da contabilidade social da Cidade da Cultura". É dicir, determinarase o "valor social" que achega á cidadanía galega este complexo cultural.
O plan estratéxico para a próxima década definirá as liñas de traballo da Cidade da Cultura e ten por obxectivo "ser útil para a cidadanía e un aliado das industrias galegas", explicou Lorenzo na comisión cuarta de Educación e Cultura este venres. Este chegará despois de que o pasado ano concluíse o primeiro proxecto destas características para a Cidade da Cultura, que cubriu os anos 2012 a 2018.
Pola súa banda, o informe sobre o valor social do complexo segue a liña de estudos europeos e pretende determinar a achega á sociedade das entidades e organizacións culturais. Así, "o coñecemento dese valor axudará á difusión pública e á fortaleza da Cidade da Cultura", engadiu Lorenzo.
Despois de dez anos de andaina, a Cidade da Cultura segue sendo contemplada como un proxecto a medio-longo prazo que, a curto prazo, se xestiona con "realismo, dilixencia e humildade". O director xeral sostén tamén que é un "elemento tractor, que aglomera as industrias culturais e creativas de Galicia" e busca a participación da cidadanía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.