O presidente do Tribunal Superior de Xustiza de Galicia pide maior presenza da muller en altos cargos xudiciais

O presidente do Tribunal Superior de Xustiza de Galicia (TSXG), José Maria Gómez y Díaz-Castroverde, presidiu este venres a toma de posesión dos novos presidentes das Salas do Contencioso-Administrativo e do Social, María Dolores Rivera Frade e Luís Fernando de Castro Mejuto.

No seu discurso, que tamén contou coa presenza do fiscal superior, Fernando Suanzes, así como dos membros da Sala de Goberno, o presidente do TSXG destacou o feito de que Rivera sexa a primeira muller que ocupa unha presidencia de sala en toda a historia do Tribunal.

"O feito de que a muller sexa maioría na carreira xudicial española debe corresponderse con idéntica presenza nos altos cargos xudiciais", dixo o presidente do TSXG, que pide desta forma unha maior presenza feminina nos altos cargos da Xustiza.

Unha demanda que tamén fixo a nova presidenta da Sala do Social. Rivera reclamou "maior presenza da muller" nas altas institucións do ámbito xudicial, á vez que se comprometeu a promover mecanismos que conduzan a conseguir unha "sala moderna, dixitalizada, adaptada ás novas tecnoloxías".

A necesidade do desenvolvemento da modernización tecnolóxica da Xustiza foi reafirmada polo presidente do TSXG, quen no seu discurso tamén tivo palabras para remarcar a necesidade de traballar de maneira conxunta para "loitar contra a secuela da violencia de xénero".

Pola súa banda, o presidente da Sala do Social, Luís de Castro, fixo referencia aos "tempos difíciles" da xurisdición social, á vez que reclamou maior rapidez na Xustiza.

Os novos presidentes foron nomeados polo pleno do Consello Xeral do Poder Xudicial (CGPJ) o pasado 30 de outubro. Rivera sucederá no cargo a Díaz-Castroverde, elixido en xullo presidente do TSXG. O posto que asumirá De Castro quedou vacante ao vencer o mandato do maxistrado Antonio Jesús Outeiriño Fuente como presidente da Sala do Social.