Cal é o futuro das capturas de pescada sur e do lagostino?

A conselleira do Mar, Rosa Quintana, cre que hai "marxe" para conseguir que a frota española manteña nivel de capturas de pescada sur deste ano en 2019, fronte ao recorte do 20% exposto pola Comisión Europea, e considera que os últimos informes científicos avalan a apertura da pesqueira de lagostino tras catro anos de peche.

Así se expresou en declaracións aos medios no marco da reunión na que os ministros de Pesca dos Vinte e oito deben fixar as posibilidades de pesca da frota comunitaria para o ano 2020. "Defendemos que aplicando o rango máis alto recuperariamos un 47% da biomasa mantendo as mesmas posibilidades de pesca que en 2019. Por tanto, desde Galicia demandamos que se nos manteñan as mesmas posibilidades de pesca", reivindicou Quintana.

"Cremos que hai marxe para conseguir un 'roll-over' (o mesmo nivel que neste ano) e por pedimos ao Ministerio que defenda esta postura", insistiu a conselleira galega, de cara a unhas negociacións que non se pecharán, salvo sorpresa, ata a madrugada do martes ao mércores.

Con respecto ao lagostino capturado fronte á costa galega, Quintana asegurou non entender as "cabezonerías" que conducen a manter pechada esta pesqueira por quinto ano consecutivo "se se comprobou que nestes cinco anos constatouse un incremento da biomasa" deste stock. "Os científicos tamén teñen que ser conscientes de que detrás das súas decisións hai un sector de actividade económica", salientou. "Forcemos o suficiente á Comisión para conseguir xa a apertura este ano aínda que sexa con poucas toneladas", completou.

O pesqueiro arrastreiro galego Piscator faenando no Atlántico Sur | Fonte: shipspotting.com carlosd2x