Un decálogo para evitar os micromachismos nas xuntanzas de Nadal
O documento, elaborado pola Deputación da Coruña, inclúe 10 puntos para concienciar á sociedade e evitar micromachismos.
- As mulleres xornalistas detectan micromachismos e teito de cristal na súa profesión
- A violencia sexual na vida cotiá: cancións e titulares que perpetúan a 'cultura da violación'
Por Europa Press / Redacción | A CORUÑA | 17/12/2019 | Actualizada ás 13:06
A Deputación da Coruña elaborou un decálogo para fomentar unhas "festas en igualdade". O documento inclúe dez pautas parar axudar á sociedade a que tome conciencia sobre certos comportamentos e así evitar certos "micromachismos".
A deputada de Igualdade, María Muíño, presentou este martes en rolda de prensa a campaña 'Festas en Igualdadade', que inclúe este documento de dez puntos que o organismo provincial fará público a través da súa web e que tamén facilitará a organismos, asociacións e demais administracións.
"A idea é que se comparta e chegue a máis persoas", asegura Muíño sobre o documento que inclúe 10 pautas que, entre elas, destaca o bloque orientada a acabar cos comportamentos sexistas na crianza dos máis pequenos.
Así, por exemplo, ante as próximas datas do Nadal, o documento inclúe un punto que fai referencia á non existencia de xoguetes nin cores de nenos e nenas: "O xogo é libre", recolle este decálogo.
MANUAL LINGUAXE NON SEXISTA
"As festas son para que as gocen todas as persoas, se corresponsable nas tarefas familiares e colabora" é o primeiro punto deste decálogo, que tamén rexeita "as bromas machistas" e insta a ter unha "actitude activa" ante agresións sexistas.
O documento tamén insta a convivir "con dignidade e respecto ante as orientacións sexuais" e a incluír unha "linguaxe de xénero", entre outros aspectos.
Así mesmo a deputación presentou tamén unha actualización do manual 'Linguaxe non sexista'. Trátase dunha guía do organismo provincial, agora ampliada, dirixida tanto ao persoal desta institución como aos concellos da provincia coruñesa.
