Por E.P. | SANTIAGO DE COMPOSTELA | 21/12/2019 | Actualizada ás 18:40
Unha partida orzamentaria de 2,75 millóns de euros repartirase entre miles de galegos emigrados que se atopan fóra do país e en situación de precariedade.
Estas subvencións teñen o obxectivo de emendar as necesidades básicas de subsistencia e atención sociosanitaria de todas aquelas persoas que sexan emigrantes de orixe galega e poidan certificalo ante a Secretaría Xeral da Emigración.
Con estas axudas, que son de carácter individual e concorrencia non competitiva, a Administración autonómica pretende tender unha man ante as situacións complicadas para esas persoas.
En función do grao de necesidade no que se atopen, a Xunta establece sete tipos de subvencións. As primeiras son aquelas por unidade familiar en situación de precariedade, as outorgadas por situación de dependencia ou enfermidade grave da persoa solicitante, por situación de dependencia ou enfermidade grave no seo da unidade familiar ou por invalidez ou enfermidade permanente.
Igualmente, existen axudas para a cobertura de medicamentos e tratamentos de enfermidades crónicas cando teñan un custo elevado, para mulleres que sufran violencia de xénero e para paliar unha situación de desemprego na unidade económica familiar.
O prazo de solicitude abre o próximo 23 de decembro e pechará o 5 de febreiro de 2020.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.