A Lotaría de Nadal en Galicia: cae o segundo premio na Fonsagrada e Vigo

O número 10.989, agraciado co segundo premio do Sorteo Extraordinario de Lotaría de Nadal, dotado con 1.250.000 euros á serie, deixou dous millóns e medio en premios na localidade lucense da Fonsagrada e en Vigo.O número foi cantado ás 11.31 horas no primeiro arame da sexta táboa.

Concretamente, o número foi vendido na localidade lucense da Fonsagrada, onde a administración da Avenida de Galicia despachou unha serie completa deste número, agraciada con 1.250.000 euros. Outro tanto vendeu a administración da rúa Policarpo Sanz, en Vigo.

TERCEIRO E CUARTO PREMIO

O número 750 resultou agraciado co terceiro premio do Sorteo , dotado con 500.000 euros á serie. O número foi cantado ás 11.11 horas no quinto arame da quinta táboa. En Galicia, deixou medio millón de euros repartidos entre Vilalba e O Grove, así como un premio de 50.000 euros en Santiago de Compostela.

Unha serie completa deste número foi para a administración da Rúa de Pravia de Vilalba, que este domingo celebra tamén a súa Feira do Capón. A mesma cantidade, 10 décimos, foi despachada na administración da rúa Luís Seoane do Grove. No caso de Santiago, vendeuse un décimo no Castiñeiriño. Cada serie está premiada con 500.000 euros, 50.000 euros ao décimo.

O número 41.710, agraciado co primeiro dos dous cuartos premios e dotado con 200.000 euros á serie, foi vendido parcialmente na Coruña. Entre outras localidades, unha serie completa deste premio foi vendida na cidade da Coruña, concretamente no Centro Comercial Marineda City, onde repartiu 200.000 euros en premios.

O 49.797 DEIXA MÁIS DE CINCO MILLÓNS EN CUNTIS

O número 49.797, agraciado co segundo dos dous cuartos premios do Sorteo Extraordinario de Lotaría de Nadal, dotado con 200.000 euros á serie, deixou máis de cinco millóns na localidade pontevedresa de Cuntis. O número foi cantado ás 13.14 horas no noveno arame da décima táboa. Trátase do último gran premio de todo o sorteo.

O 49.797 estivo repartido por distintos puntos da xeografía española, pero repartiu sorte especialmente en Galicia, máis concretamente na localidade de Cuntis, cuxa administración da Praza de Ferrol despachou 253 décimos deste número, algo máis de cinco millóns de euros en premios.

O 66.212 DÁ SORTE A COMPOSTELA

O número 66.212, agraciado co cuarto dos oito quintos premios do Sorteo e dotado con 60.000 euros á serie, deixou máis de 280.000 euros en premios en Galicia, dos que 252.000 foron para Santiago de Compostela.

Cantado ás horas 10.39 no terceiro arame da cuarta táboa, o 66.212 caeu en varias localidades galegas, entre elas en Santiago de Compostela --onde foi vendido por tres administracións distintas--, Muxía, Pontevedra e os municipios pontevedreses de Salceda de Caselas e O Porriño e en Monforte de Lemos.

Tres administracións diferentes de Santiago de Compostela venderon décimos do número. En concreto, a da Praza da Inmaculada repartiu tres series completas e sete décimos, mentres que outros tres vendéronse nunha administración do Polígono do Tambre e dous nunha de Concheiros. En total, foron 252.000 euros en premios. A maiores, unha administración do Porriño vendeu outros dous décimos do 66.212, que repartiu sorte tamén en Muxía, Monforte de Lemos, Pontevedra e Salceda de Caselas, cun décimo premiado con 6.000 euros en cada localidade.

O 6.293 CAE EN TODA GALICIA

Por outra banda, o número 6.293 resultou agraciado co segundo dos oito quintos premios do Sorteo, dotado con 60.000 euros á serie. Cantado ás 10.24 horas, no noveno arame da terceira táboa, quedou moi repartido por toda España e caeu en localidades das catro provincias galegas.

O 6.293 deixou un dos premios importantes da Lotaría de Nadal de 2019 en Galicia e foi para A Coruña, onde na administración do supermercado Carrefour de Alfonso Molina se venderon 25 series e un décimo desta cifra, o que supón algo máis de 1,5 millóns de euros en premios. Así mesmo, vendéronse dous décimos en Ourense e outros dous en Vigo, e un décimo nas localidades lucenses de Rábade e Guitiriz, en Padrenda e en Tui, O Porriño e Vigo, na provincia de Pontevedra. Cada un dos décimos está dotado con 6.000 euros.

O 74.770 REPARTE DOUS MILLÓNS EN PONTEVEDRA

O número 74.770, agraciado con outro dos oito quintos premios do Sorteo Extraordinario de Lotaría de Nadal e dotado con 60.000 euros á serie, repartiu algo máis de dous millóns de euros en varias localidades de Pontevedra, así como en Fene e en Mazaricos, na Coruña.

Case todos os premios deste número foron a parar a Vigo, concretamente á administración da Avenida das Camelias 110, onde se venderon 35 series, 2.100.000 euros en premios. Así mesmo, na provincia de Pontevedra, vendéronse décimos en Moraña, Cerdedo, Cangas, Lalín, O Porriño, Salceda de Caselas e Vilagarcía de Arousa. Dous décimos foron parar tamén aos municipios coruñeses de Mazaricos e Fene.

O 81.610 DEIXA UN BELISCO EN SANTIAGO E SANXENXO

O número 81.610 resultou agraciado co último dos oito quintos premios do, dotado con 60.000 euros á serie. O número foi cantado ás 13.12 horas no noveno arame da novena táboa e estivo repartido en varias localidades, entre elas Santiago de Compostela e Sanxenxo, onde se venderon dous décimos deste número.

O GORDO PASA DE ESGUELLO

O número 26.590 resultou agraciado co Gordo, o primeiro premio do Sorteo Extraordinario de Lotaría de Nadal, dotado con 4.000.000 euros á serie. Trátase dun dos 'gordos' máis madrugadores da historia, que apareceu dez minutos despois de iniciarse o Sorteo, pero non conseguiu adiantar ao de 2004, que apareceu ás 9.16 horas.

O Gordo caeu en Salou (Tarragona), Salmanca, San Vicente do Raspeig (Alacante), Alcoy (Alacante), Moraira (Alacante), Barcelona, Las Torres de Cotillas (Murcia), Súria (Barcelona), na Adminitración Dona Manolita de Madrid, Beniajan (Murcia) e Sevilla. Con todo, esquivou nesta ocasión Galicia.

O número foi cantado ás 9.19 horas no cuarto arame da primeira táboa. Noura Alkrouh e Elizabeth del Carmen Roque Figuereo cantaron número e premio, e Santo Daniel de León Santa e Bileiky Lisselot Arias Ciprián extraeron as bólas.

OS PREPARATIVOS DO SORTEO

O Sorteo Extraordinario da lotaría de Nadal 2019 arrincou este domingo ás 9.09 horas, minutos despois da hora de inicio prevista ao redor das 9.00 horas aproximadamente. Este ano repartiranse 2.380 millóns de euros en premios, a mesma cantidade que o ano anterior e os agraciados co 'Gordo' recibirán 400.000 euros ao décimo.

Un ano máis, pasadas as oito da mañá do 22 de decembro, ultimábanse os detalles e preparativos para a celebración do Sorteo da Lotaría de Nadal no Teatro Real de Madrid, situado na praza de Isabel II.

Ao redor das 8.00 horas abríronse as portas de entrada ao teatro para o numeroso público que facía cola para poder tomar asento no salón. Tamén á primeira hora chegaron os nenos e nenas da Residencia-Internado de San Ildefonso de Madrid, encargados de repartir a sorte, que este sábado realizaron no salón o último ensaio xeral.

Posteriormente, procedeuse á presentación de liras ao público, para que os espectadores puidesen comprobar de forma efectiva, previa autorización do presidente, que a bóla co seu número estaba no bombo.

Tras envorcar as bólas cos números premiados na tolva para ser traspasada ao seu respectivo bombo, procedeuse ao enchido do bombo grande entre aplausos do público, o dos números. Tras concluír o enchido, pechouse con chave ás 9.02 horas o bombo. Hai dous tipos de bólas, as dos números que son 100.000, e as dos premios, 1.807, todas elas fabricadas en madeira de boj.

Ás 9.04 horas, introducíronse as bólas correspondentes aos premios de pedrea e, seguidamente, os premios maiores foron proclamadas segundo categorías por un funcionario de Lotarías e Apostas do Estado ante a mesa que preside o sorteo de Nadal, antes de introducilas, tras varias comprobacións, no bombo pequeno.

Ás 9.08 horas concluíu este labor entre a crecente expectación do público que comezou a aplaudir e corear desde o patio de butacas, e apareceron os nenos e nenas de San Ildefonso que, tras saudar ao público, tomaron posicións no escenario do Teatro Real para comezar de inmediato o sorteo que se iniciou ás 9.09 horas.