Puy descarta preocupación no PP ante un posible pacto da esquerda galega "dados os antecedentes"
O portavoz do Grupo Popular cre que o PP "tería que asumir a súa responsabilidade" se Sánchez fixese como Rajoy e ofrecese "unha coalición"
- En Marea chama a BNG e Anova para crear unha candidatura unitaria da esquerda
- Martiño Noriega levará as relacións políticas de Anova, que apela a iniciar "xa" o diálogo
- Luca Chao cre que "xaneiro será o momento" para "reactivar" o diálogo con Anova e EU
Por E.P. | SANTIAGO DE COMPOSTELA | 23/12/2019 | Actualizada ás 14:13
O portavoz do Grupo Popular no Parlamento galego, Pedro Puy, considera que o PP "podería ter e tería que asumir a súa responsabilidade" respecto da investidura do presidente en funcións e secretario xeral do PSOE, Pedro Sánchez, se este "fixese o mesmo que fixo no seu momento o señor Rajoy, que é propor un Goberno de coalición entre os dous partidos máis votados". "Pero iso non é o que está a ocorrer", puntualizou.
Nunha rolda de prensa celebrada este luns na Cámara autonómica, Puy cualificou de "absurdo" que os socialistas pidan a abstención dos deputados populares no Congreso tras chegar a un acordo con Unidas Podemos e suxeriu que "podía buscar un Goberno alternativo ao que el (Pedro Sánchez) quere facer".
Neste contexto, afeou que o presidente do Executivo estatal e candidato á reelección decidise "a poucas horas" dos comicios do 10 de novembro asinar unha coalición con Unidas Podemos, "que por certo non chega á maioría", e que "descartase" outras opcións.
"Ninguén do Partido Popular, nin de Galicia nin do conxunto de España, pode estar de acordo cunha conformación de Goberno entre Podemos, Partido Socialista e os independentistas cataláns que parece ter o apoio dos independentistas ou soberanistas galegos", continuou.
"Mentres o contexto sexa que o señor Sánchez segue insistindo en gobernar con Podemos e cos independentistas cataláns, poucas responsabilidades pode asumir o PP máis que una que é moi importante: a de denunciar que eses pactos excedan o que é normal nun procedemento de investidura" e en "condicionar cuestións que son de Estado", concluíu.
A ESQUERDA "MÁIS RADICAL"
Noutra orde de cousas, o portavoz popular no Pazo do Hórreo tamén foi preguntado sobre se existe preocupación no seo do seu partido ante as conversacións que empeza a haber na esquerda co obxectivo de desbancar a Alberto Núñez Feijóo da Xunta tras as eleccións autonómicas previstas para o outono do 2020, salvo adianto.
Así, Puy descartou que haxa preocupación con perder a maioría absoluta na Cámara "dados os antecedentes" desa esquerda "máis radical", tal e como a cualificou. Para iso, lembrou as "escisións permanentes" dese espazo, na anterior lexislatura baixo as siglas de Alternativa Galega de Esquerdas (AGE) e na actual baixo a xa extinta marca de En Marea como partido instrumental.
"Estaremos preocupados nos próximos meses en ofertar unha alternativa reformista que garanta a estabilidade de Galicia", sentenciou Pedro Puy.
