O Centro Tecnolóxico da Carne investirá 2,6 millóns de euros en I+D+i en 2020
Por E.P. | SANTIAGO DE COMPOSTELA | 25/12/2019 | Actualizada ás 19:30
O Centro Tecnolóxico da Carne investirá un total de 2,6 millóns de euros en I+D+i ao longo de 2020, exercicio no que levará a cabo 53 iniciativas de cooperación con empresas e outras entidades do sector agroalimentario.
Segundo informou este mércores a Consellería do Medio Rural, o titular do departamento autonómico, José González, presidiu a reunión de final de ano do padroado da fundación Centro Tencolóxico da Carne. Neste encontro, fíxose balance da actividade realizada no segundo semestre do presente ano e déronse a coñecer as liñas de actuación do próximo exercicio.
A Xunta destacou que se cumpre cos obxectivos do Plan Estratéxico de Galicia no eixo de empregabilidade e crecemento intelixente, que busca impulsar e consolidar as políticas de gasto vinculadas á investigación para integrar a Galicia no círculo virtuoso da innovación para o crecemento.
Deste xeito, o importe orzamentario tradúcese nunha actividade relevante do CTC, que poderá desenvolver un elevado número de proxectos nos próximos 12 meses.
PROCEDENCIA DOS INGRESOS
A Administración autonómica informou de que os fondos do CTC proveñen fundamentalmente do financiamento de proxectos de innovación autonómicos, nacionais e internacionais, sobre todo europeos.
