A banca pecha 49 oficinas máis en Galicia, que queda con 1.428 sucursais

As entidades de depósito españolas pecharon 553 sucursais no terceiro trimestre, ata situar o total da rede en 24.855, segundo a estatística recentemente publicada polo Banco de España.

Mentres que en 2018 se suprimiron 1.309 oficinas, entre xaneiro e setembro deste ano pecháronse 1.156, sendo especialmente intenso o terceiro trimestre, a razón de seis clausuras por día, o que provocou que a rede baixase das 25.000 sucursais por primeira vez desde xuño de 1980.

Por comunidades autónomas, os maiores recortes experimentáronos Cataluña e Castela e León, con 79 peches en cada unha, ata 3.375 e 1.834, respectivamente. Tamén destacaron Andalucía, con 72 peches (ata 4.115), Madrid, con 53 clausuras (ata 3.061), Comunidade Valenciana, con 51 (ata 2.433) e Galicia, con 49 (ata 1.428).

Así mesmo, en Castela-A Mancha pecháronse 29 oficinas, en Estremadura suprimíronse 28, en País Vasco 21, en Aragón 17, en Baleares 21, en Canarias 15, en Rexión de Murcia 14, en Navarra 9, en Asturias 9, na Rioxa 8 e en Cantabria 3. En Ceuta e Melilla mantivéronse as 37 oficinas existentes.

Os principais responsables desta onda de peches foron CaixaBank e Santander, tras acordar este ano senllos Expedientes de Regulación de Emprego (ERE). Banco Santander completou o pasado mes de novembro o peche de 1.128 sucursais, no marco da integración de Banco Popular. Só entre xullo e setembro, a entidade clausurou 395 oficinas en España.

Do seu lado, o Plan Estratéxico de CaixaBank anunciado hai un ano contemplaba pechar máis de 800 sucursais ata mediados de 2020. No terceiro trimestre de 2019, o banco reduciu a súa rede en 183 oficinas.

Imaxe dunha oficina do Banco Santander.. EUROPA PRESS - Arquivo