Por Europa Press / Redacción | SANTIAGO DE COMPOSTELA | 26/12/2019 | Actualizada ás 15:51
O presidente da Xunta, Alberto Núñez Feijóo, admitiu que as "previsións económicas" en 2020 en Galicia son "incertas" --situación que vinculou fundamentalmente coas incertezas do escenario político estatal--, pero garantiu "estabilidade política e orzamentaria". Un feito que vinculou coas eleccións galegas do vindeiro ano e a posibilidade de que volva saír vencedor "cun goberno estable".
"Hai máis estabilidade en Galicia sabendo que en 2020 haberá eleccións autonómicas que a que hai na política española", dixo Feijóo, quen se mostrou convencido de que tamén das urnas galegas o próximo ano "sairá un goberno estable".
Sobre o aviso do Foro Económico de Galicia, o presidente subliñou que, se se analiza a última década entre 2008 e 2018, "o resumo" é que Galicia "crece algunhas décimas e centésimas máis das consolidadas ata agora".
Dito isto, reivindicou que en Galicia "hai e haberá estabilidade política", mentres que no Goberno estatal "non", o que interpretou como "un mal presaxio económico". Así, fixo fincapé nas "incertezas moi potentes" que hai sobre a mesa, dada a "ausencia" no Estado de "política estable" e "dun Goberno previsible".
Nos compromisos con Galicia que poderían influír no plano económico, eximplificou co AVE, do que non hai, a día de hoxe, "máis que a confirmación do incumprimento" das datas comprometidas e da "soberbia" do Goberno que dirixe Pedro Sánchez.
Tamén lamentou que Sánchez "non teña tempo" para atender as demandas das empresas electrointensivas e de velar por empregos chaves como os da factoría de Alcoa en San Cibrao, entre outros, mentres "negocia" para tratar de ser investido presidente. "O importante é quedar ben con ERC e humillarse nos termos que concrete ERC", resolveu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.