O BNG demanda a retirada dos militares españois de Iraq e denuncia a "postura cómplice" do Goberno con EE.UU.
Pide a retirada dos 500 efectivos militares españois destacados en Iraq nunha misión internacional apoiada por Estados Unidos e a OTAN.
Por Europa Press / Redacción | SANTIAGO DE COMPOSTELA | 08/01/2020 | Actualizada ás 13:30
O BNG denunciou este mércores a postura "cómplice e sumisa" do Goberno español e da Unión Europea ante o asasinato do comandante iraniano Qasem Soileimani por parte de Estados Unidos, que tivo lugar o pasado venres 3 de xaneiro en Iraq.
Ante estes feitos, o BNG demandou a retirada dos 500 efectivos militares españois destacados en Iraq nunha misión internacional apoiada por Estados Unidos e a OTAN. Nun comunicado, a formación nacionalista galega sentenciou que a inexistencia de condena por parte do executivo e da UE son "un clamoroso exemplo da súa docilidade obediente respecto da administración Trump".
Ademais, condenaron este "novo episodio imperialista" de Estados Unidos que, declararon, "non ten escrúpulos para violar a soberanía dun Estado" e mesmo, "provocar un novo conflito bélico con repercusións potencialmente gravísimas".
Así mesmo, a formación quixo reafirmar a súa posición internacional "activamente antimperialista" de "defensa do desarmamiento, a non inxerencia e respecto á soberanía dos pobos". Por este motivo, valorará "o impulso dunha mobilización social" en Galicia, en función de como evolucione a situación.
